Жетісу өңірінде жол сапасын жақсартуға ден қойылған. Бірер жылда сапасыз жол деген ұғым жойылады. Себебі, жол салу жұмысы қарқынды жүріп жатыр.
Биыл 198 шақырым аудандық маңызы бар жолдар жөнделді. 80 елді мекеннің ішкі көшелерін жөндеуге 35,5 миллиард теңге бөлінді. Оның ішінде облыстық маңызы бар автомобиль жолдарын жөндеуге 19,2 миллиард теңге қарастырылған. Ұлттық қордан және республикалық бюджеттен 5,4 миллиард теңге, жергілікті бюджеттен 13,8 миллиард теңге, аудандық, ішкі және қалалық жолдарды жөндеуге 16,3 миллиард теңге бөлінді. Жол жөндеуге бөлінген қаражат дұрыс игерілгеннің нәтижесінде жақсы және қанағаттанарлық жағдайдағы аудандық маңызы бар автомобиль жолдарының үлесі 93%-ға жетті. Бұл – жақсы көрсеткіш.
Облыста туристік кластерді дамыту мақсатында жүзеге асырылып жатқан негізгі ірі жоба Балқаш көлінің жағасына апаратын 137 шақырым автожолды қайта құру жұмысы жүйелі жалғасуда. Жол сапасы жақсарса, инфрақұрылым жүйесі жүйелі іске асса туризм саласы жақсы дамитыны анық.
Алматы – Өскемен – Лепсі – Ақтоғай тасжолының ұзындығы 110 шақырымды құрайды. «ЖОЛ» ЖШС басты мердігер жалпы сомасы 30,4 миллиард теңгеге құрылыс жұмысын жүргізуде. Жұмыс 2025 жылы аяқталады деп жоспарлануда.
2023 жылы бюджеттен 5,2 миллиард теңге бөлінді. Бүгінде 50 шақырымына асфальт төселсе, келер жылы қалған 60 шақырымы жөнделеді.
Лепсі – Балқаш тасжолының 27 шақырымында бас мердігер «Казстройцентр» ЖШС құрылыс жұмысын жүргізуде. Бөлінген қаржы тиімді пайдаланылып, асфальт-бетон жабындысын төсеу жұмыстары толығымен аяқталды. Бүгінгі таңда жол толығымен игерілуде.
Жоспар бойынша 5 көпір салынуы қажет. Биыл 2 көпірдің құрылысы аяқталып, пайдалануға берілді.
2024 жылы жалпы сомасы 40,7 миллиард теңгеге 216 шақырым аудандық маңызы бар жолдарды жөндеу және 75 елді мекеннің ішкі көшелерін жөндеу жоспарлануда. Жоспардың жүйелі орындалуы басты назарға алынбақ.
«Жетісу-Ақпарат»
Фото: inbusiness.kz
