Жаркент өңірінде ұзақ жылдар бойы халық денсаулығын сақтау жолында абыроймен қызмет еткен «Денсаулық саласының үздігі», дәрігер-хирург Рақыш Бірімқұлов пен Панфилов ауданының Құрметті азаматы, медицина ғылымдарының кандидаты Мұрат Мұхаметжанов қызмет істеген аудандық ауруханада мемориалдық тақта ашылды.
«Еңбек – адамның көркі, адам – заманның көркі» демекші, бар өмірін денсаулық сақтау саласына арнап, жас пен кәріге, жалпы адамзаттың бәріне көмек қолын созып, шипалы емімен, жылы лебізімен сырқаттың сақаюына орасан зор еңбек сіңірген ақ халатты абзал жандардың бірі де бірегейі Рақыш Бірімқұлов қазіргі Кербұлақ ауданының Басши ауылында дүниеге келген. Еңбек жолын Қоңырөлең ауылындағы дәрігерлік пункттен бастап, кейіннен аудандық ауруханада хирург болып қызмет атқарды. Өңірдегі алғашқы медбикелерді даярлайтын училищенің ашылуына мұрындық болған азамат ауданның бас дәрігері қызметіне дейін көтерілген. 1967-1968 жылдары қазіргі аудандық аурухананың ғимаратын салдырды.
Рақыш Бекеұлы өзінің білімі мен мол тәжірибесін жас мамандарға үйретуден жалықпады. Соның нәтижесінде өңірде дәрігерлердің бүтіндей бір іскер, білімді, өз ісіне адал буыны қалыптасты. Рақыш Бірімқұловтың ізбасары, ақ халатты абзал жандардың бірі, сол кезеңнің барлық құнды қасиеттерін бойына сіңіре білген, қатардағы дәрігер-хирургтен ауданның бас дәрігеріне дейін жетіп, аудандық аурухананы 30 жылға жуық басқарған Мұрат Мұхаметжановтың есімі де ел есінде. Ол басқарған жылдары өңірдің емдеу саласы барынша өркендеп, дәрігерлік мекемелердің материалдық-техникалық базасы нығайды. Телемедицина орталығы іске қосылып, 5 ғылыми-зерттеу институтымен байланыс орнатылды. Аудандық аурухана осы заманғы озық үлгідегі қондырғылармен қамтамасыз етілген болатын.
Екі тарланға арналған ескерткіш тақтаның ашылу жиынында аудан әкімі Марат Сағымбек, Рақыш Бекеұлының бауыры Қуаныш Бекеев, медицина ғылымдарының докторы, профессор Нұрлан Балтабеков, медицина саласының ардагері Тұрысбек Әлпейісов сөз сөйлеп, еліне өлшеусіз еңбек сіңіріп, соңына абыройлы есімін қалдырған ардагерлерді ардақтады. Жиыннан соң марқұмдардың рухына Құран бағышталып, ас берілді.
М. Манапұлы
Жаркент қаласы
