Агроөнеркәсіптік кешен саласындағы субсидиялаудың өзекті мәселелері облыстық кәсіпкерлер палатасы жанындағы АӨК және тамақ өнеркәсібі салалық кеңесінің кезекті отырысында талқыланды.
Кеңес отырысы «Текелі ГМЗ» ЖШС өтінішін талқылаудан басталды. Онда өтінімдерді уақытылы қарамау және бюджет қаражатының үнемі жетіспеушілігі проблемасы көтерілді. Бұл өндірістегі төлемді кешіктіреді. Атап айтқанда, кәсіпкердің өтінішінде ауылшаруашылығы басқармасына қатысты реніш болды. Мәселен, онда өтінімдерді қабылдаумен бір адам ғана айналысады.
Сондай-ақ, осы мәселені талқылау барысында Gosagro.kz. веб-портал жұмысына назар аударылды. Мәселен, салалық кеңестің төрағасы Александр Хильниченко өңірде көптеген шағын шаруашылықтардың бар екенін, олардың арасында компьютерлік сауаттылыққа ие адамдардың аз екенін тілге тиек етті.
Александр Хильниченко: «Gosagro сайтында шаруашылықтар өрістердің контурын қолмен жаңартуға мәжбүр. Мемлекеттік жер кадастрының автоматтандырылған ақпараттық жүйесінің (МЖК ААЖ) республикалық бағдарламасы бар. Онда барлық мемлекеттік актілер суреттелген. Gosagro порталы мен МЖК ААЖ синхрондау қажет. Егіс алқаптарының контурын өзектендіруді қолмен алып тастау және мемлекеттік жер кадастрының автоматтандырылған ақпараттық жүйесінен автоматты түрде тартылатын жер учаскесінің аудандарын сақтау арқылы өсімдік шаруашылығындағы субсидиялау үдерістерін жеңілдетуді ұсынамын», – деді.
Өз кезегінде облыстық ауылшаруашылығы басқармасы басшысының орынбасары Бақтияр Шампиков тыңдалып, техникалық қиындықтардың себеп-салдары түсіндірілді. Белгілі болғандай, Gosagro ақпараттық жүйесі ағымдағы жылы енгізілген. Сондықтан, тиісінше техникалық кемшіліктер орын алуы мүмкін. Техникалық мәселелерге қарамастан басқарма қажетті жұмысты орындайды. Бақтияр Шампиковтың айтуынша, жыл басынан бері олар 14 753 мемлекеттік қызмет көрсеткен: берілген кредиттер бойынша 219, тұқым шаруашылығында лицензия беру бойынша 12, өсімдік шаруашылығы бойынша 3 022, минералды тыңайтқыштар бойынша 4 452.
Мәселені қарау қорытындысына сәйкес кеңес резервтік өтінімдерді ескере отырып, алдағы жылға арналған бюджетті жоспарлауды пысықтау, өтінімдерді жеделдетіп қарау үшін субсидиялаумен айналысатын бөлімдердің жұмысын күшейту, GOSAGRO порталын МЖК ААЖ-мен синхрондау туралы ҚР АШМ-ге ұсыныстар енгізу ұсынылды.
Отырыс барысында кеңес мүшелері «Мурад» шаруа қожалығының жетекшісі Дамира Лятиеваның өтінішін қарады. Ол ауылшаруашылығы басқармасының үш жыл бұрынғы мал шаруашылығына субсидияларды қайтаруға қатысты әрекеттеріне құқықтық баға беруді сұрады. Берілген ақшаны қайтаруды талап ете отырып басқарма жануарлар миграциясының жоқтығына сілтеме жасайды. Осы мәселе бойынша кеңесте сыбайлас жемқорлыққа қарсы қызметке ауылшаруашылығы басқармасының ауылшаруашылығы тауарын өндірушілерден субсидияларды қайтару жөніндегі талаптарының заңдылығы туралы мәселені пысықтау ұсынылды.
Айгүл БАЙБОСЫНОВА
Фото: kapital.kz
