Белгілі әнші Димаш Құдайберген Женеваға барып, БҰҰ Женевалық филиалының басшысы Татьяна Валоваямен кездесті, деп хабарлайды 7-su.kz желілік басылымы.
Бұл туралы әнші өзінің Instagram парақшасында жазды,
«Кеше, 6 қарашада таңғажайып Женева қаласына бардым. Онда мен Біріккен Ұлттар Ұйымының Женевалық филиалының басшысы Татьяна Валоваямен кездестім. Кездесу барысында біз бірлескен жобалардың келешегін талқыладық. Сондай-ақ, белгілі тұлғалардың әмбебап адами құндылықтарды, бейбітшілік пен өзара түсіністік идеяларын ілгерілетуде ерекше рөл атқара алатынын атап өттік»,-деп жазды Димаш.
Сондай-ақ ол Ұлттар сарайында болып, Женева кітапханасы мен БҰҰ мұрағаттарындағы өнер туындыларымен, тарихи құжаттармен және нысандармен танысқанын айтты.
Кейінірек Уилсон сарайында — БҰҰ-ның Адам құқықтары жөніндегі басқармасында және халықаралық көші-қон ұйымының штаб-пәтерінде кездесулер өткен.
«Сондай-ақ, Қазақстанның БҰҰ жанындағы Женевадағы Тұрақты өкілдігіне барып, қызметкерлермен және олардың отбасы мүшелерімен кездестім. Тұрақты өкіл Ерлан Әлімбаевпен кездесу барысында мен Женева алаңындағы Қазақстанның жұмыстарының басым бағыттарымен таныстым»,-дейді Димаш Құдайберген.
