Қарашың 5 жұлдызы Сарқан ауданында өңір әкімінің халықтық сайлауы өткені белгілі. Сол күні сайлаушылардың басым бөлігі, атап айтқанда 20162 сайлау құқығы бар азаматтар дауыс беріп, бірауыздылық танытып, көпшіліктің қалауымен Сарқан ауданының әкімі лауазымына Ғалымжан Маманбаев сайланды.
Бүгін ауданға актив арнайы келген Жетісу облысының әкімі Бейбіт Исабаев жұртшылыққа жаңа әкімді таныстырды.
Ғалымжан Қанатұлы туған ауданында ұзақ жылдар бойы аудан әкімінің әлеуметтік сала бойынша орынбасары қызметінен бір жыл бұрын ғана аудан әкімі болып тағайындалған болатын. Осы уақыт аралығында аудан тұрғындарының сенімін ақтап, өзіне дейінгі қолға алынған іргелі істерді жалғастыра білгені көпке аян.
Аудан бойынша мал шаруашылығы саласында ілгерілеушілік бар, ауыл шаруашылығы дақылдарынан алынған өнімнің көлемі артты. Биыл 1300 гектар алқапқа қант қызылшасының тұқымы себіліп, орташа өнімділік гектарына 394 центнерден айналды. Ақсу қант зауытына өткізілген тәтті түбірдің дені Сарқан ауданының еншісінде.
Аграрлы ауданның тыныс-тіршілігі бірқалыпқа түсіп, барлық салада ілгерілеушілік байқалып, құрылыс өркен жайып, елді мекендер абаттанып, жол күйі жақсарып, қара жердің қайтарымы еселеніп, жайылым жерлер қайтарылып, шаруалардың талап-тілектері жүзеге асқандықтан болар саяси науқанға тұрғындар белсене атсалысқанын, сайлаушылардың 85 пайызы өз әкімдерін қолдап дауыс бергенін актив жиынында Бейбіт Өксікбайұлы атап көрсетті. Сонымен қатар өңір басшысы ел сенімін иеленудің жауапкершілігіне кеңінен тоқталды.
Жиында сөз алған Сарқан аудандық қоғамдық кеңестің төрағасы Жанат Мұқашев әкімнің бойындағы жақсы қасиеттерді санамалай отырып, алдағы жұмыстарына сәттілік тіледі. Келесі кезекте сөз алған «Атамекен» кәсіпкерлік палатасы аудандық ұйымының директоры Сания Елубаева аудан тұрғындары бірауыздан сайлап, үлкен сенім артқан әкімнің алдағы асуларды бағындыруына .
Көп тілегімен ажарланған басқосуды қорытындылаған облыс басшысы жаңа сайланған әкімнің жауапкершілігі мол қызметіне табыс тіледі.
Жақсылық ЖОМАРТҰЛЫ.
Сарқан ауданы..
