Ішкі нарықта азық-түлік қауіпсіздігін қамтамасыз ету Мемлекет басшысының алға қойған басты міндеттерінің бірі. Бұл барлық тұтынушының мүддесін қамтиды.
Талдықорған қаласындағы Баспа үйінде журналистермен брифинг өтті. Онда облыстық сауда және тұтынушылар құқықтарын қорғау департаментінің 9 айдағы атқарған жұмысы мен «Сапалы өнім» жобасы таныстырылды. Аталған тақырып аясында ҚР Сауда және интеграция министрлігі Жетісу облысы бойынша сауда және тұтынушылар құқықтарын қорғау департаментінің басшысы Еділ Зайтбеков, Техникалық реттеу және метрология комитеті облыстық департаментінің басшысы Бибігүл Омарова, облыстық санитарлық-эпидемиологиялық бақылау департаменті басшысының орынбасары Самат Ахметов сөз сөйледі.
Белгілі болғандай, тұтынушылар құқығын және жосықсыз бәсекелестікті бұзатын нормативтердің, іс-қимылдардың бұзылуын анықтау және ішкі нарықта азық-түлік қауіпсіздігін қамтамасыз ету мен тұтынушылар құқығын қорғау мақсатында «Сапалы өнім» жобасы іске асады. Бүгінде облыста тұтынушылар құқығын қорғау саласында өтініш көбейіп келеді. Мысалы, биылғы 1 қазан бойынша аталған департамент көмегімен 417 өтініш түсіп, оның 167-сі оң шешімін тапқан. Сөйтіп, тұтынушыларға 9 706 000 теңге қайтарылған. Яғни, бұл өткен жылмен салыстырғанда 4 есе көп.
Өтініштердің ішінде сапасыз тауарды жөндеуден, айырбастаудан және қайтарудан бас тарту бойынша шағымдар бар. Өтініштердің басым бөлігі бөлшек сауда және тұрмыстық қызмет көрсету саласынан. Тұтынушы тарапынан түсетін өтініш ай сайын 25-30%-ға өсуде. Яғни, бұл халықтың құқықтық сауаттылығының артып келе жатқанын байқатады.
Сондай-ақ, облыс аумағында техникалық реттеу саласында және техникалық регламенттердің талаптарына сәйкес келмейтін өнімдердің айналымына жол бермеу мақсатында меморандум әзірленіп, Техникалық реттеу және метрология комитетінің облыс бойынша департаментімен меморандумға қол қойылған. Департамент мамандары сауда орталықтары мен дүкендерге күнделікті мониторинг жүргізеді. Нәтижесінде сапасы күмәнді шетелдік тауар өнімдері анықталмаған. Сондай-ақ, тұтынушылардан бұл бағытта департаментке арыз-шағым түспеген.
Брифинг соңында журналистер спикерлерге сұрақ қойып, жауап алды.
Айгүл Байжұмақызы
Фото: ашық дереккөзден
