Көненің көзіндей, тарихтың өзіндей болған жәдігерлерді жинақтап жүйелеу, оларды келешекке сақтап жеткізу, өзге жұртқа барымызды көрсетіп насихаттау – абыройлы міндеттің бірі.
«Сарқан ауданы тарихы» музейі 1968 жылдан 2017 жылға дейін «Черкасск қорғанысы музейі» деп аталған. Мұражай 3 нысаннан тұрады. Біріншісі 1910 жылы салынып 1918-1919 жылдары Черкасск қорғанысы кезінде әскери ғимараты штаб болған. Екіншісі 1978 жылы Черкасск қорғанысының 70 жылдығына орай жаңадан тұрғызылған музей ғимараты. Кейін Даңқ мемориалы болып қайта жаңғырды.
Мұражай меңгерушісі Мадияр Кәрібжанның айтуынша ғимараттың күрделі жөндеуіне 2017 жылы 32 млн-нан астам теңге, көркемдік-безендіру жұмыстарына 41 млн. теңге бөлініп, тиісті жұмыстар атқарылған.
«Черкасск қорғанысы» көрсетілім кешені 4 бөлмеден тұрады, онда сол кезеңде қолданылған атыс қарулары, табылған заттар жинақталған.
2 ғимараттың экспозициясы үш тақырыптық бөлімнен құралған: 1917 жылға дейінгі аудан, кеңестік кезеңдегі өңір тарихы және тәуелсіздік алған кезеңнен бергі өлке тарихы.
Мадияр Әділханұлының айтуынша музейдегі ең құнды экспонат – аулада орналасқан 1904 жылғы үлгідегі 76 мм үш дюймді зеңбірек.
Өңірдің өткен тарихы жәдігерлерін келер буынға аманат қылып сақтап отырған музейдің өлкетануға қосып отырған өзіндік орны бар.
Жақсылық ЖОМАРТҰЛЫ,
Сарқан ауданы
