Аграрлы салаға арқа сүйеген Ақсу ауданы үшін дала жұмыстарының маңызы зор. Күні кеше ғана көк теңіздің толқынындай болып желмен тербелген егіс алқабы – енді алтын түске боялып, дала қызыл, жасыл, сары, қоңыр реңге ауысып, бейне бір дәмге толы ақ дастарқанға айналғандай.
Егін орағы да әлдеқашан басталып, аймақтағы кейбір ауылдық округтер дәнді дақылдарын қырманға түсіріп те үлгерді. Бидайларын ұшырып, тазалап, кептіріп қамбаға салып жатыр. Науқанға білек сыбана кіріскен аудан диқандары жайдары жаздың әр сәтін қалт жібермей, астық ору қарқынын үдете түскен.
Астық ору науқанының қалай жүріп жатқанын көзімізбен көру үшін сапарды «Аяла» шаруа қожалығының басшысы, аудандық мәслихат депутаты Абылай Қанатұлының егін алқабынан бастадық.
Шаруа қожалығы 2018 жылы әкесі Қанат Абдрахмановтың басшылығымен құрылған болатын. Ол кезде шаруашылықта ешқандай техника жоқ. Барлығын жалдап істететін. Сонда да егін алқабын жыл сайын көбейтіп, содан алған өнімнің нәтижесінде екі «КамАЗ» автокөлігі мен жер жыртатын бес трактор сатып алады. Оның үшеуі «МТЗ – 82», екеуі үлкен техника «МТЗ – 12», 21 тракторы.
Қазіргі таңда шаруашылықтың барлық жұмысын ұлы Абылай қолға алған. Биылға 800 гектарға егін ексе, оның 250 гектары бидай, 550 гектары арпа екен. 30 гектарға дәндік жүгері де сеуіпті. Ендігі міндет – егін орағы науқанын лайықты атқару. Бұл үшін барлық қажетті техника күші жұмылдырылған. Сарқан ауданынан екі комбайн көмекке келіп, екі «КамАЗ» автокөлігімен қырманға жөнелтуде. Әзірге әр гектарынан 20 центнерден өнім алуда.
– Алдыда бұдан да қалың шыққан, суғарылған алқаптардан 25 – 27 центнерден шығуы мүмкін, – дейді Абылай Қанатұлы.
Егін алқабының жанындағы жүгері алқабына барғанымызда суарылып жатыр екен. Қазірдің өзінде биіктігі бойдан асатын әр жүгеріде білектей-білектей үш собықтан өнім беріп тұрғанын көрдік.
«Болашақта жүгері алқабын 150 гектарға, бидайды 600 гектарға, ал арпаны тағы да 550 гектарға көбейтсем», – дейді шаруа қожалық басшысы.
Бірақ астықты қабылдау бағасы әлі белгіленбегенін айтады.
«Сонда да, оған аса алаңдап отырғанымыз жоқ. Өйткені сапалы астыққа қашанда сұраныс мол», – дейді Абылай.
Жақсылық ЖОМАРТҰЛЫ
