Нашақорлық – әлемдегі барлық мемлекетті толғандыратын аса өзекті әлеуметтік мәселе. Ол мемлекеттің басты конституциялық байлығы саналатын адамның санасын улаумен бірге денсаулығы мен болашағына да балта шабады. Осы жаман әдетке мемлекеттің болашағы саналатын жасөспірімдердің әуестеніп кеткені қоғамда алаңдаушылық туғызып отыр.
Тәуелсіз қазақ мемлекеті есірткіге қарсы күресте халықаралық жобалар мен заңнамаларды және өз мемлекетіміздің заңнамаларын басшылыққа алады. Есірткіге қарсы күресте халық-аралық оперцияларды ұйымдастыру, трансұлттық есірткі таратушы арналарды жою, қылмыстық топтардың жолын кесу мақсатындағы шараларды да жүзеге асырып келеді.
Есірткілердің заңсыз айналымының түрлі әдіспен жүзеге асырылуы да құқық қорғау органдарының жұмыстарына жаңа қиындық туғызуда. Нәтижесінде нашақорлық қылмыстардың да саны артып отыр. Есірткіні пайдалану және оларды тарату жолдары жастар арасында кеңінен таралып, осылай ақша табудың жеңіл һәм тиімді жолына айналды. Қоғамды меңдеген осы қауіпті дертпен күрестің тиімді болуы үшін осы міндет тек құқық қорғау, медициналық және өзге де құзырлы мекемелерге ғана тән деген қасаң түсініктен бәріміз арылып, әрбір ата-ана өз отбасында, мектептерде, барлық деңгейдегі оқу орнында, жергілікті жерлерде замана дертінің қауіптілігін түсіндіру керек.
Есірткіге қарсы күрес жүргізетін құзырлы органдар «Психикалық денсаулық орталығымен», барлық деңгейдегі білім беру мекемелерімен бірлесе отырып, сонымен бірге көпшілік ортада да жастарымызды саламатты өмір салтын ұстануға, қазақтың салт-дәстүрін ұстануға, адал еңбек етуге шақыратын жобаларды жүйелі түрде жүзеге асырып отырғаны дұрыс. Мектептердегі құқықтық тәлім-тәрбиені дамытуға арналған ментор қызметінің енгізілуі өз нәтижесін береді. Сонымен бірге жасөспірімдерге сапалы білім берумен бірге құқықтық тәрбие беру мәселесінде практик-заңгерлерді іс-шараларға кеңінен тарта отырып жасөспірімдер бойында нашақорлық пен есірткі саудасына қарсы әлеуметтік иммунитетті қалыптастыруға да білім беру мекемелерінің басшылары көп көңіл бөлуі қажет.
Қорыта айтқанда, нашақорлық – адамның өз-өзіне алдын ала көр қазуы, басына ойда-жоқта саналы түрде пәле тауып алу әрекеті. Нашақорлық сияқты аса қауіпті дертке ұшырататын, есірткілік, психотроптық зиянды заттарға тәуелділікке әкеп жеткізетін зиянды әдеттерден жас жеткіншектеріміздің аулақ болғаны абзал. Жастар біздің мемлекетіміздің болашағы, өміріміздің жалғасы – ұрпағымыз болғандықтан оларды тек нашақорлық емес, өзге де кез келген зиянды әрекеттерден сақтаудың шараларын алдын ала қарастырғанымыз дұрыс.
Бекмұхамет СӘЛІМҰЛЫ,
«Мейірім» Жаркент арнаулы әлеуметтік қызмет көрсету
орталығы» КММ заңгері
