Облыстық ардагерлер үйінде «Қоғамдық жұмысқа қатысу белсенділігін арттырудағы зейнеткерлердің рөлі мен міндеттері» тақырыбында семинар өтті. Оған барлық аудан, қала ардагерлер ұйымының төрағалары, орынбасарлары, қоғамдық комиссияның және облыстық ардагерлер кеңесінің мүшелері қатысты.
Аталмыш жиын облыстағы ардагерлер мен зейнеткерлердің белсенділігін арттыру, оларды мәдени-бұқаралық іс-шаралармен қамту және қоғамда болып жатқан аса маңызды саяси-әлеуметтік реформаларды жан-жақты талқылау мақсатында өрбіді.
Жиын барысында алғашқы болып сөз алған облыстық ардагерлер кеңесінің төрағасы Ермек Келемсейіт:
– Күні кеше ғана қасиетті Түркістан қаласында өткен Ұлттық құрылтайда Мемлекет басшысы: «Біз, аға буын өкілдері, еңбекқорлық, іскерлік сияқты құндылықтарды өзіміз үлгі көрсету арқылы дәріптеуіміз керек. Жастарымыз көп сөзге құмар, жағымпаз, жалқау, енжар, масыл болмауға тиіс. Оларды осындай теріс әдеттерден қашық болуға үйретуіміз керек», – деп ардагерлердің алдағы уақытта атқаратын, арқалайтын жауапкершілігін атап өтті.
Әрине, біздің қоғам өзгерісті біреуден мадақ есту үшін емес, ең алдымен, өзі үшін жасауға тиіс. Мұны елдің ертеңі, ұрпақтың жарқын болашағы жолында қолға алуымыз керек. Бүгінде ардагерлер ұйымдарының ықпалы орасан, белсенділігі зор, бұқаралық қозғалыс екендігі дау туғызбайды, – дей келе қазыналы қарттарды белсенді болуға, қоғамның темірқазық тұтқасы ретінде жастарға өнеге таратуға шақырды.
Жалпы алғанда, Жетісу облысы бойынша 80 мыңнан астам зейнеткер бар. Оның 60 пайызынан астамы қоғамдық жұмысқа тартылып отырған аудан, қала ардагерлер ұйымдарының мүшелері екен. Қазіргі кезде облыстық ұйым 8 аудандық, 2 қалалық және 400-дей бастауыш ұйымды өз қатарына біріктіріп отыр. Міне, тәлім мен тағылымның, өнеге мен өсиеттің ордасы саналған осынау мекеме бүгінде сан түрлі шараның ұйытқысына айналып, түрлі мәдени-рухани дүниенің бастауын құрады. Шара барысында аталмыш ұйымның жұмыс жоспары пысықталып, ардагерлерге жауапкершілік жүктелді.
Өз кезегінде сөз алған Талдықорған қалалық ардагерлер кеңесінің төрағасы Ақшабай Керімбеков баяндама жасап, семинар жұмысын пысықтаса, бірқатар аудандық ардагерлер ұйымының төрағалары аталмыш тақырып аясындағы ой-тұжырымдарын ортаға салып, өңірлерде атқарылып жатқан істі баяндады.
АРДА БИ
