Прокурорлар Қаратал өзеніне кәріз суын құйып, өзенді ластап жатқан құбыр иесін іздеп тапты.
Еске салайық, видеоны балық аулауға суға келген жергілікті тұрғын түсіріп алған. Ер адам жанұясымен табиғат аясында демалуды жоспарлағанын, бірақ барлық жоспарын өткір, әрі сасық иіс бұзғанын айтты. Кадрларда лай судың қалай тікелей өзенге ағып жатқаны көрсетілген.
«Қараталға ағынды сасыған су осылай құйылады. Құбыр толығымен су астында. Бұл жақтан шыққан иіске адам шыдамайды. Мен отбасыммен балық аулауға келдім, енді мұнда балық аулауға болмайды екен. Қайдағы балық?!», – дейді бейнетүсірілім авторы.
Құбырдың кімге тиесілі екенін және өзенге қандай сұйықтық құйылып жатқанын Талдықорған қаласының прокурорлары анықтады. Бұл қаланың кәріз желісі екені белгілі болды. Жергілікті әкімдіктің хабарлауынша, су деңгейі көтеріліп, 22 кәріздік сорғы станциясындағы қысым төсемшесінің шайылып кетуі салдарынан коллектор құбыры жарылған.
«Қазіргі уақытта ол ажыратылып, резервтік желіге ауыстырылды. Төтенше жағдайлар бригадасы қалпына келтіру жұмыстарын бастады» делінген хабарламада.
«Қаратал» ықшамауданы, бірқатар мемлекеттік мекемелер мен аурухана қалдықтары 22-кәріздік сорғы станциясына құйылатыны белгілі болды. Бұл жағдай қанша уақытқа созылғаны және ол үшін біреу жазалана ма, ол жағы әзірге белгісіз.
Авторы: Сандуғаш Дүйсенова,
Талдықорған
Фото: көргекілік үшін
