Оқу-ағарту министрі жұмыс сапарымен Жетісу облысына келді. Ғани Бейсембаев Панфилов ауданының педагогикалық құрамымен кездесті, деп хабарлайды 7-su.kz желілік басылымы DKNews.kz сайтының дерегіне сүйеніп.
Бүгінгі таңда білім сапасын арттыру, аттестация жүйесін және педагогтерді ынталандыру тәсілдерін жетілдіру ең өзекті мәселенің бірі болып отыр.
— Мемлекет педагог мәртебесін көтеру мақсатында бірқатар шараларды қолға алуда. Оның ішінде мұғалімдердің жалақысын көтеру – жүзеге асырылған басты қадамдардың бірі. Министрлік бұл бағыттағы жұмысты жалғастыра береді. Мұғалімдерді аттестациялау жүйесін жетілдіру бойынша кешенді жұмыс жүргізіліп, портфолио қалыптастыру барысы қайта қаралуда. Келешекте мұғалімнің жетістігі оның әрбір оқушысының жетістігімен бағаланатын болады. Атап айтамын, еліміздің жетекші педагогтері — педагог-шеберлер мен педагог-зерттеушілер білім саласының барлық мамандары үшін үлгі болуы керек, — деді Ғани Бейсембаев
Жетісу облысында барлығы 15 мыңнан астам педагог еңбек етеді, оның ішінде 2309 педагог-зерттеуші, 63 педагог-шебер бар.
Сондай-ақ министр сапары кезінде жоспардан тыс шалғайдағы оқу ұйымдарында болып, мектеп дәретханаларының жағдайын қарады, оқу орындарындағы дабыл түймелерін, төтенше жағдай кезіндегі жедел әрекет ету қызметін, балалардың қауіпсіздігінің қамтамасыз етілуін және мектептегі тамақтандырудың ұйымдастырылуын тексерді.
Министр қауіпсіздік шараларын сынақтан өткізген білім ұйымдарының арасында Х.Хамраев атындағы орта мектеп, Д.Рақышұлы атындағы орта мектеп мектепке дейінгі шағын орталығы, Кәлпе орта мектебі, Сарқан қаласының №3 арнайы мектеп-интернаты бар. Атап өту керек, білім ұйымдарына жоспардан тыс бару Жетісу өңіріндегі барлық аудандарда жүргізілуде.
