Еліміздің өңірлерінде күзгі дала жұмыстары қорытындыланып, диқандар маңызды дақылдарды жинауды табысты аяқтауға жақындады, – деп хабарлайды 7-su.kz ақпараттық порталы.
«Қазгидромет» шаруашылықтардағы дақылдардың жай-күйіне жүргізілген мониторинг қорытындысын жариялады. Мамандардың бағалауынша, Қазақстанда күнбағыс егістіктері толық жинау пісіп-жетілу кезеңіне өтті. Қазан айының екінші онкүндігінде өсімдіктердің жағдайы негізінен жақсы, ал кейбір телімдерде қанағаттанарлық деп бағаланды. Респбуликаның теріскейінде жаздық астық жинау жұмыстары толық мәресіне жетті.
Оңтүстік және оңтүстік-шығыс аймақтарда жылу сүйгіш дақылдарды жинау мен күздік егістік науқаны параллель жүріп жатыр. Түркістан облысының Ордабасы мен Жетісай аудандарында мақта жинау қарқынды ұйымдастырылып, өсімдіктердің жағдайы өте жақсы дәрежеде сақталуда. Сонымен қатар Алматы облысының Еңбекшіқазақ ауданында жүгері дақылы толық пісіп, шаруалар бастыруды бастады. Түркістан мен Жамбыл облыстарында күздік бидай егу үшін жерді жырту және тырмалау шаралары жүргізіліп, алғашқы өскіндер байқалды.
Ауыл шаруашылығындағы осы жағымды жаңалықтар Жетісу өңірінің аграрлық секторы үшін де зор маңызға ие. Жетісу облысының Ақсу ауданында соя мен жүгері өнімін жинауға кірісті. Аймақтың құнарлы топырағы мен қолайлы ауа райы мол өнім алуға септігін тигізуде. Ал Сарқан ауданындағы Сарқан метеостанциясы маңында күздік бидайдың күзгі вегетациялық кезеңі аяқталса, Талдықорған өңірінде күздік бидай өскіндері бітік шығып, алғашқы оң нәтижесін көрсетті.
Аграрлық саланы қолдау және дақылдарды уақытында ысырапсыз жинап алу елдің азық-түлік қауіпсіздігін нығайтады. Диқандардың маңдай термен келген еңбегі өңір экономикасын өркендетіп, ішкі нарықтағы өнім бағасының тұрақтылығын қамтамасыз етеді. Заманауи агротехнологияларды қолдану арқылы сапалы өнім алу мүмкіндігі артпақ.
