Әкімдіктер ауылды дамытуға бөлінген 128 млрд. теңге қаржыны толық игере алмай отырғанға ұқсайды. Бұл туралы Ұлттық экономика министрі Әлібек Қуантыровтың өзі мәлімдеген.
«2022 жылы 577 ауылда бір мыңнан аса жобаны іске асыруға 128 млрд. теңге бөлінген. Биыл 1 қаңтардағы жағдай бойынша, облыс әкімдіктері бөлінген қаражаттың 94%-ын игерген», – деп мәлімдеді Қуантыров кезекті үкімет отырысында.
Дәлірек айтқанда, 7,7 млрд. теңге қаржы игерілмей отыр. Қаражаттың дұрыс игерілмеуі Ұлытау, Маңғыстау және Батыс Қазақстан облысында тіркелген.
Айта кетейік, 2023 жылғы 1 қаңтардағы жағдай бойынша, Қазақстанда 6 293 ауыл бар, онда 7,8 млн-ға жуық қазақстандық тұрып жатыр. «Ауыл – ел бесігі» жобасын іске асыру үшін, болашағы бар 3,5 мың ауыл іріктеліп алынды.
«ЖЕТІСУ» АҚПАРАТ
