Премьер-Министр Әлихан Смайыловтың төрағалығымен онлайн режимде селекторлық жиын өтті. Онда көші-қонның өзекті мәселелері, «Жайлы мектеп» ұлттық жобасын іске асыру, халықты көмірмен қамтамасыз ету жұмысы талқыланды. Сондай-ақ, көмірді банк арқылы бөліп төлеу, үйден отырып көмірге тапсырыс беру сияқты пилоттық жоба іске қосылғаны сөз болды.
Алғашқы мәселе бойынша сөз алған Ішкі істер министрі Марат Ахметжанов еліміздегі криминогендік жағдай тұрақты екенін мигранттар тарапынан Қазақстан азаматтарына қатысты жасалған қылмыстар тіркелмегенін айтты. Сонымен қатар, ІІМ шетелдік азаматтардың қоғамдық қауіпсіздігін және заңдылығын қамтамасыз етуді бақылауды күшейткендігін, адамдар көп шоғырланатын жерлерде полиция нарядтарының саны артқанын жеткізді.
«Бірінші кезекте қазақстандық азаматтар үшін тұрақты «жасыл дәлізді», сондай-ақ, тіркелмеген мигранттарды анықтау үшін мобильді мониторингтік топтардың жұмысын қамтамасыз ету қажет», – деген Премьер-Министр Қазақстан азаматтарының арасында да, мигранттар арасында да көші-қон мәселелерін реттеу бойынша қабылданып жатқан шаралар туралы ақпараттық-түсіндіру жұмыстарын күшейтуді тапсырды.
Екінші мәселе бойынша сөз алған Премьер-Министр «Жайлы мектеп» ұлттық жобасы аясында 800 мың оқушыға арналған жаңа форматтағы мектептер салу жоспарланғанын айтты.
«Оқулықтарды цифрлық форматқа көшіруді жеделдету және балаларды ауыр сөмкелерден арылту қажет. Сондай-ақ, әкімдіктермен бірлесіп, оқушыларды планшеттермен қамтамасыз ету мәселесін шешуді қолға алу керек. Атап айтқанда, «Қазақстан халқына» қорымен бірлесіп, оларды ауылдық мектептердің балалары үшін сатып алу мүмкіндігін пысықтау керек», – деген Әлихан Смайылов, Цифрлық даму, инновациялар және аэроғарыш өнеркәсібі министрлігіне байланыс операторларымен бірлесіп, еліміздің барлық мектептерін сапалы жылдамдығы жоғары интернетпен қамтамасыз етуді тапсырды.
Үшінші мәселе бойынша, азаматтарға ыңғайлы болуы үшін көмірді танымал маркетплейстер мен банк қосымшалары арқылы өткізу жолдары пысықталып жатқаны айтылды. Бұл бағытта еліміздегі ең ірі банктердің бірі Қостанай облысында пилоттық жобаны іске қосты.
Премьер-Министр үйден шықпай-ақ көмірге тапсырыс беру тұтынушыларға қолайлы екенін айтып, жергілікті жерлерде тиісті түсіндіру жұмыстарын жүргізу қажеттігін жеткізді. Соңында жауапты мамандарға көмірді жеткізіп беру мен бөлуді ерекше бақылауда ұстауды тапсырды.
Айдар НАЗАРҰЛЫ
Жетісу облысы
