«Жетісу облысында көліктің жаңа тіркеу нөмірі белгілі болды. 19-ншы өңірдің алғашқы мемлекеттік нөмірін 35 жастағы тұрғын алды», — деп хабарлайды Жетісу облысындағы Халыққа қызмет көрсету орталығының баспасөз қызметі.
Тарихи сәтте ең алғашқы болып көлігіне жаңа мемлекеттік нөмір алған Біржан Жаңғабылов:
«Елімізде Жетісу облысы 19-ншы өңір болып тіркелді. Соған сәйкес «019 ААV 19″ номерін автокөлігіме алдым. Тіркеу 20 қыркүйек күні түнгі сағат 23:30-да жүргізілді. Ал көлік нөмірі бүгін таңертеңгі сағат 09:00-де берілді. 35 жастамын. Талдықорған қаласының тұрғынымын. Осындай тарихи сәттің куәсі болғанға қуаныштымын», — деді.
Жетісу облысына жаңа нөмірлерді тіркеу 20 қыркүйектен басталды. Ал бүгіннен бастап тұрғындардың қолына жаңа нөмірлер беріле бастады.
«Жалпы, Жетісу облысына 19-шы аймақ бойынша 500-ге жуық көліктің мемлекеттік тіркеу нөмірлері келді. 20 қыркүйектен бастап оны тіркеп, беру басталды. Сондай-ақ, бұған дейін Алматы облысының 05 мемлекеттік тіркеу нөмірімен жүрген Жетісу облысының тұрғындары көліктерін қайта тіркеуге ауыстырғанға дейін ескі нөмерлерімен жүруге болады», — деді Талдықорған қаласындағы мамандандырылған Халыққа қызмет көрсету орталығының бөлім басшысы міндетін атқарушы Болат Айманбетов.
Айта кетейік, бүгін Жетісу облысында 150-ден аса адам көліктің жаңа мемлекеттік тіркеу нөмірін алып үлгерген.
«ЖЕТІСУ-АҚПАРАТ»
