Облыстың әлеуметтік-экономикалық дамуының бүгінгі күндегі көрсеткіштері көңіл қуантады. Биыл Алматы облысы ауылшаруашылығының жалпы өнім көлемі 1 трлн. теңгеден асты. Аймақтың ел бойынша қант қазылшасы, майбұршақ, жүгері, көкөніс, картоп, ет, жұмыртқа, жүн өндіруде алдыңғы қатардан көрініп келе жатқаны, жүзім мен сүт өндіруде екінші орын алатындығы да бәсіміздің биіктігін білдіреді. Бүгінгі таңда облыстағы өнеркәсіптік әлеуетті өркендетуге ден қойып отырған екі мыңнан аса кәсіпорынның 82 пайызы агроөнеркәсіп кешенінің еншісінде. Демек, ел тұрғындарын азық-түлікпен қамтамасыз етуде көш басында тұрмыз деп айтуға болады. Десе де бүгінгі күннің талабы бойынша ауылшаруашылығы өнімдерін экспортқа шығару үшін осы саланың жұмысын әлі де жетілдіре түсу керек.
Бүгінгі таңда облыстағы егін мен мал шаруашылығын цифрландыру бағытында қарқынды жұмыс жүргізілуде. «Амиран» ЖШС-нің 800 басқа арналған сүт кешені Америка-Германия технологиясы бойынша Қазақстанда салынған алғашқы кешен. Кешенде малды күтіп-бағу, мал азығын дайындау, зоотехникалық және малдәрігерлік қызмет көрсету заманауи, еуро-стандарт талабына сай техника, құрал-жабдықтармен қамтамасыз етіліп, жүргізілуде. Американдық «Baumatic» компаниясы «Параллель» сүт қондырғысын орнатқан, 800 бас сиырды сауу үшін 2 ғана оператор қызмет көрсетеді. «Алматы» АШӨК-тің сүт фермасына Германияның қазіргі заман талабына сай сүт сауатын қондырғылары орнатылған. Американдық «Baumatic» технологиясы қолданылып, 600 сиыр бір күнде сауылып, 50 адамның күшін алмастырылуда. Әр сиырдан сауылған сүт автоматты түрде есептеліп, сауу көрсеткіштері компьютерге тіркеліп, тігісі жоқ сүт құбыры арқылы таза күйінде сүт блогына жиналады. «Адал» АШӨК АҚ-тың сүт фермасында тиімділігі жоғары және жетілдірілген озық технологиялық сүт сауатын «Мilkline 24*24=48» қондырғылары орнатылған, ерекшелігі – сауар алдында желінге массаж жасалынып, әр сиырдан сауылған сүт автоматты түрде есептелінеді. 1400 сиыр бір күнде сауылып, 100 адамның күшін алмастырады. «ЖК «Каримов» сүт фермасында Германия мемлекетінен әкелінген 330 бас Голштин сүт бағытындағы асыл тұқымды сиырлар швециялық «Деловал» фирмасының сүт сауатын роботтық қондырғылары арқылы автоматты түрде сауылып, «Дельта 5.2» бағдарламасымен жұмыс істеуде. «Байсерке Агро» ЖШС-і сүт фермасында 634 бас Канададан әкелінген сүт бағытындағы асыл тұқымды сиырлар швециялық «Деловал» фирмасының сүт сауатын роботтық қондырғылары арқылы автоматты түрде сауылуда. «Табыс» ШҚ 600 басқа арналған сүт кешенінде Украина мемлекетінен әкелінген сүт бағытындағы асыл тұқымды сиырлар швециялық «Деловал» фирмасының сүт сауатын роботтық қондырғылары арқылы автоматты түрде сауылуда.
Етті мал шаруашылығымен айналысатын «Арқарлы Майбүйрек» ЖШС-і 2014 жылы Австралия мемлекетінен 5615 бас ангус және герефорд асыл тұқымды ірі қара мал басын әкеліп, қазіргі таңда 15433 басқа көбейді. Заман талабына сай күн сәулесін пайдалану арқылы электрленген қоршау ішіндегі малдар еркін жайылып, үнемі бақылауда. «Алипов» ШҚ да ірі қара малын «Электр қоршау» арқылы жайылымда бағу тәсілін пайдалануда. Бұл мал жайылымын тиімді пайдаланып, көлемі аз жерден өзіндік құны төмен және сапасы жоғары мал азығын дайындауға мүмкіндік береді. Компьютерленген блок арқылы 50 гектар алқапта аталған қоршауды пайдалана отырып, 100 бас сиыр бағылуда.
Жалпы, ауылшаруашылығы саласының басты міндеті – елімізді негізгі азық-түлік өнімімен толық қамтамасыз ету. Сондықтан бұл саланы өркендету арқылы күнделікті өмірде туындап отырған қиындықтарды шешіп, азық-түлік қауіпсіздігін қамтамасыз етумен бірге бағаның тұрақтылығын да сақтауға болады.
Қажет АНДАС
