Ұлыстың ұлы күніне орай Алматы облысы әкімінің орынбасары Батыржан Байжұманов «Айналайын» балалар үйіне барып, мекеме ұжымына мерекелік көңіл-күй сыйлады.
Наурыз мейрамына тыңғылықты дайындалған балалар ұлттық нақышта киініп, келген қонақтарды зор ілтипатпен қарсы алды. Ғимарат ішінде патриоттық әндер шырқалып, ғұрыпқа сай бауырсақ пен наурызкөже пісірілді.
– Балаларды шын жүректен Наурыз мейрамымен құттықтаймын. Сіздерге баянды бақыт пен әр істе сәттілік тілеймін. Әр күндерің осындай мерекеге толы болсын. Сіздердің болашақтарыңыз үшін барлық жағдайды жасаймыз. Елдің келешегі сіздерсіздер. Әрдайым биіктен көрініңіздер. Осы сәтті пайдалана отырып, балаларға білім мен тәрбиені қатар беріп жатқан ұстаздар қауымына алғыс айтқым келеді. Тәрбиешілер мен мұғалімдердің еңбегі ерен, олардың алдында басымызды иеміз. Балалардың жүзінен бақыт лебі еседі. Ең бастысы осы, – деді облыс әкімінің орынбасары.
Шара аясында өнерлі балалар концерттік бағдарлама ұсынды. Ұжым қызметкерлері бірлесіп, Наурыз мейрамының тарихынан сыр шертетін көрініс қойды. Қойылымға оқушылар да, мұғалімдер де атсалысты. Ұжымдық шығармада мерекенің мән-маңызы түсіндірілді. «Біз Наурыз мейрамын жылда асыға күтеміз. Менің ойымша, Ұлыс күнінің өзге мерекелерден ерекшелігі көп. Мереде ұлттық ойындар ойнатылып, байқаулар ұйымдастырылады. Осындай шараны қолға алған тәрбиешілерге, хореографтарға алғыс айтамыз», – деді тағылымды шарадан әсер алған оқушылар.
Іс-шарадан кейін балаларға сый-сыяпат таратылды.
ӨЗ ТІЛШІМІЗ
