Райымбек ауданындағы Сарыжаз ауылының маңында, Лабасы тауының етегінде облысымыздың 90 жылдығына арналған шаңғыдан облыстық жарыс өтті. Жарысқа облыс аумағындағы 3 қала, 17 ауданнан шаңғышылар қатысып, ортақ бәсекені қыздыра түсті.
– Құрметті жарысқа қатысушылар! Ауданымызда өткелі отырған шаңғышылар жарысына келген қадамдарыңыз құтты болсын! Мемлекетіміздің басшысы Қасым-Жомарт Тоқаев денсаулығымыздың кепілі болып табылатын спортты оның ішінде ауыл спортын дамытуға баса назар аударуды міндеттеген болатын. Қазіргі таңда аудан орталығында спорттық-сауықтыру кешені салынып, ел игілігіне айналды. Алдағы уақытта іргелі елді мекендерден шағын спорт кешендері салынатын болады. Ауданымыздың бірнеше ауылында шаңғы секциясы жұмыс істейді. Әсіресе, дәл осы Сарыжаз ауылында спорттың осы түрі жақсы дамыған. Жарыс жолына түскелі отырған барлықтарыңызға сәттілік тілеймін!, – деді жарыстың салтанатты ашылуында Райымбек ауданының әкімі Нұржан Құдайбергенов.
Тартысты әрі қызықты өткен жарыстың қорытындысы бойынша Еңбекшіқазақ ауданынан келген шаңғышылар командасы 1 орынды жеңіп алды. Райымбек ауданының шаңғышылары 2 орынға, Талғар ауданынан келген шаңғышылар 3 орынға ие болды. Жарыс жеңімпаздарына облыстық дене шынықтыру және спорт басқармасының дипломдары, медальдары тапсырылды.
Қанат БІРЖАНСАЛ,
Райымбек ауданы
