Кеген ауданының шаруа қожалықтары, серіктестіктері мен өндірістік кооперативтері мал қыстату науқанын ойдағыдай өткізуде. Ақпан айы туғалы өңірге біраз қар түсті. Күн суытып, қыс күшіне енді.
Ауданда жалпы 53726 бас ірі қара, 29527 бас жылқы, 206522 бас қой-ешкі қыстатылуда. Сындарлы науқанға байланысты әр ауылдық округте жұмыс тобы құрылып, малшылардың жайын біліп, назарларына алып отыр. Аудан бойынша 409 мал қыстауларында жұмыс жүріп жатыр.
Өткен жылы төрт түлік мал үшін 69572 тонна шөп әзірленді. Таулы өңірде асыл тұқымды абердин-ангус, герефорд, әулиекөл атты ірі қара өсіретін төрт шаруашылық, асыл тұқымды арқар меринос қойын өсіретін төрт шаруашылық бар. Оларда асыл тұқымды 5280 бас ірі қара, 10700 бас қой өсірілуде.
Өңірдегі төрт түлік малдың жағдайы жаман емес. Шаруа қожалықтарының ұжымы, малшылар алда келе жатқан көктемгі төл алу науқанына дайын отыр.
Қанат БІРЖАНСАЛ
Кеген ауданы
