Талдықорған қаласындағы №12 орта мектеп-гимназиясының 11-сынып оқушысы Айгерім Есімхан журналист болуды армандап жүрген жас қалам иесі. Жуырда ол республикалық «Ұлан» балалар мен жасөспірімдер газетінің «Жас тілшісі» атанды. Оған Айгерімнің кішкентай кезінен талмай мақала жазып, ізденуі негіз болды.
– «Ұлан» газетіне алғашқы мақалам осыдан бір жыл бұрын «Қазақстандағы вайн» атауымен жарық көрді, – дейді жас қалам иесі. – Алғашқы болғаннан кейін орны да бөлек. Білдей бір республикалық газетке мақаламның жарияланғанына қатты қуандым. Ол ары қарай ізденуіме шабыт берді. Тіпті, «Ұлан» газеті арқылы анама хат жазып, туған күнімен құттықтаған кезім де болды. Жыл бойы жазған мақалаларымды санап отырсам, 30-ға жуықтайды. Мұның қызығы да, шыжығы да бар. Әр апта сайын ізденесің, қызықты кейіпкер немесе ақпарат табуға тырысасың. Мен үшін кейіпкер табу қиынға соқпайды. Жетісудан шыққан талантты жандар жайлы жазамын. Ол арқылы туған жерімді танытуды көздеймін. Дәл осы мақалалар менің арманыма арна салды. Мақсатқа жету жолында басқа балалар жаз бойы демалыста жүрсе, мен мақалалар жазып, газет поштасына жіберіп отырдым. Жыл соңында «Ұланның» инстапарақшасында «жас тілшілер» тізімі жариялағанғанда сол қатардан өзімді көріп, қатты қуандым. Қуанышты хабарды ести салып, ата-анаммен Алматыға жол тарттық. Редакция қызметкерлерімен көзбе-көз жүздесіп, ерекше сезімге бөлендім. Бізге «Ұлан» газетінің «жас тілшісі» куәлігін табыс етті. Редакцияның сыйлаған сыйлықтары да айрықша болды. «Жас тілшілерге» деген қолдаулары нақты сезілді. Спорт комментаторы, «Ақ желкен» журналының бас редакторы Есей Жеңісұлымен қызықты сұхбат өрбітіп, батасын алып қайттық», – деп өз сырымен бөлісті.
Мұнымен қатар Айгерім облысымызда белсенділігімен танылып жүрген жас. Облыс әкімінің «Көшбасшы-2021» жастар сыйлығының «Жас Ұлан» бірыңғай балалар мен жасөспірімдер ұйымының үздік көшбасшысы номинациясының иегері. Біздің «Жетісу» газетінің де тұрақты оқырманы әрі авторы. Бұған дейін Айгерімнің түрлі тақырыптағы мақалаларын жариялап, арманына жетуіне қанат байлап келеміз. Жетісудың мақтанышы Айгерімге биікке самғай бер, қанатың талмасын дегіміз келеді.
Алма ЕСЕНБАЙ,
Алматы облысы
