«Jetіsý» газетіне Қаратал ауданы Байшегір, Ақжар, Дөңши ауылдарының тұрғындарынан хат келді. Ауыл тұрғындары интернет желісі мен ұялы байланыстың өте нашар екенін айтып, редакциядан көмек сұрауда.
Аталған ауылдар облыс орталығынан 250 шақырым қашықтықта орналасқан. Байшегір ауылдық округінде 1305 адам тұрады. Ауылдың негізгі тіршілігі – мал шаруашылығы мен балық аулау. Ауа райы да өзгеше. Қысы қатал, жазы өте ыстық, құрғақ болып келеді.
Ауа райын бекер айтып отырған жоқпыз. Байланыстың нашарлығынан шалғайда жатқан елді мекендерде төтенше жағдай жиі орын алып жатады. Өзен-көлді жағалап балық аулауға кеткен тұрғындар қарлы боран мен жазды күні ұйытқып соққан желден ығып, кей реттерде жоғалып кетіп жатады. Арты орны толмас қайғыға душар болған оқиға да жоқ емес. Мал баққан малшылар да осындай оқиғаны басынан кешіруде.
Осындай қиын кезде байланыс желісі жұмыс істемегендіктен ауыл тұрғындары жақындарымен байланыс орната алмай сары уайымға салынып, жандарын шүберекке түйіп отырады. Дәл осы тұста ауыл тұрғындарының редакцияға жазған хатынан үзінді келтірейін.
«2013 жылы «Кар-Тел» ЖШС тарапынан Дөңши ауылына «Билайн» ұялы байланысының бағанасы орнатылып, Алмалы, Дөңши ауылдары мен радиусы 15 шақырым қашықтықта орналасқан мал шаруашылығымен шұғылданатын шаруа қожалықтарына, балықшыларға ұялы байланыс қолжетімді болып, тұрғындар мүмкіндіктерін көрген болатын. Естуімізше, ол кезде 2G технологиясы болған. Ал қазіргі таңда «Билайн» байланысының қуаттылығы нашарлап, тіпті бағана орнатылған Дөңши ауылынан үш шақырымға толмайтын жердегі Алмалы ауылында да ұялы телефон байланысы ұстамайды. Ақ қар, көк мұзда қашықта орналасқан малшылар қауымы мен өзен, көлден нәпақасын тауып жүрген балықшылар үшін байланыстың жоқтығы тіпті қиындық туғызуда. Осының салдарынан қарлы боранда, тұманды күндері адамдардың жоғалу фактілері тіркелуде. Қазіргі технологияның дамыған заманында және пандемия кезінде интернет желісі мен ұялы байланыстың жоқтығы тұрғындармен қоса оқушы, студенттерге де оңай тимей тұр. Еліміз бойынша шалғай орналасқан елді мекендерді ұялы байланыспен, интернетпен қамтамасыз ету жөніндегі Үкімет тапсырмасы біз секілді шалғай ауылдарда қашан орындалады? Осы себептерді ескере отырып, қысқа мерзім ішінде сіздерден Байшегір ауылдық округіне қарасты Алмалы, Дөңши, Ақжар ауылдарына интернет желісі орнатылса және 3G немесе 4G технологиясы қосылса деген тілегіміз бар. Газет арқылы осы өтінішіміз жауапты, басшы органдарға жетсе деген өтінішіміз бар».
Ауыл тұрғындарының көтеріп отырған мәселесі орынды. Қазір жаңа технологияға тәуелді екеніміз белгілі. Ақпараттың барлығын осы интернет, мобильдік жүйе арқылы алатынымызды да ескеруіміз керек. Оның сыртында оқушылар мен студенттер онлайн оқу үрдісіне көшкелі жағдайдың тіптен қиындағанын ескерсек, осынау өзекті мәселені шешуіміз керек. Бұл мәселені редакция алқасының назарда ұстайтынын ескертеміз.
Ришад ТҰРҒАНБАЙ
Алматы облысы
