Облыстық дене шынықтыру және спорт басқармасы бұқаралық спорттық іс-шараларды өткізу орталығының мұрындық болуымен аймағымызда бірнеше спорт түрінен облыс біріншілігі өтті.
Атап айтсақ, Көксу ауданы, Балпық би ауылында футзалдан 40 және 50 жастан жоғары ардагерлер арасында облыс біріншілігі өтті. Жарысқа облысымыздың 11 ауданынан 180-ге жуық ардагер қатысты. Сайыс қорытындысы бойынша 40 жастан жоғары ардагерлер арасында І орынды талдықорғандық команда еншіледі. ІІ орын Қапшағай қаласының, ІІІ орын Кербұлақ ауданының командасына бұйырды. 50 жастан жоғары ардагерлер арасында І орынды облыс орталығының командасы еншіледі. ІІ орынды Көксу ауданы, ІІІ орынды Еңбекшіқазақ ауданының командасы қанжығасына байлады.
«Жастар» спорт сарайында самбо күресінен ерлер мен әйелдер және Жауынгерлік самбо күресінен ересектер арасында облыс чемпионаты өтті. Додаға 9 команда 150 спортшы қатысты. Жарыс қорытындысы бойынша жалпыкомандалық есепте спорттық самбо күресінен ерлер арасында 1-орынды Талдықорған қаласы, 2-орын Кербұлақ, 3-орын Көксу ауданының командасына бұйырды. Спорттық самбо күресінен әйелдер арасында 1-орынды Еңбекшіқазақ, 2-орынды Кербұлақ, 3-орынды Көксу ауданы еншіледі. Жауынгерлік самбо күресінен 1-орынды Көксу, 2-орынды Іле ауданы, 3-орынды Талдықорған қаласының командасы жеңіп алды.
Жамбыл ауданы Ұзынағаш кентінде волейболдан 2007-2008 жылғы жасөспірім ұлдар арасында облыс чемпионаты өтті. Жарысқа 156 спортшы қатысты. Жарыс қорытындысы бойынша 1-орынды Талдықорған, 2-орынды Қапшағай қаласы, 3-орынды Панфилов ауданының 2 командасы иемденді.
Талғарда ерлер мен әйелдер арасында қол күрестен облыс біріншілігі өтті. Додаға 10 команда, 130 спортшы қатысты. Жарыс қорытындысы бойынша жалпыкомандалық есепте 1-орынды Талғар ауданы, 2-орынды Талдықорған қаласы, 3-орынды Ұйғыр ауданыны жеңіп алды.
Қапшағайда белбеу күресінен 23 жасқа дейінгі ерлер мен әйелдер және 2002-2004 жылғы жастар арасында облыс біріншілігі өтті. Жарыста 80-ге жуық балуан күресті. Нәтижесінде жалпыкомандалық есепте 1-орынды Талдықорған, 2-орынды Қапшағай қаласы, 3-орынды Іле ауданының командасы еншіледі.
Айдар ҚАЛИЕВ,
Алматы облысы
