Жастайымыздан Қазақ радиосын тыңдап өскен соң Жетісудың жеке үнжариясы ашылды деген хабарды естігенде төбеміз көкке жеткендей болды. Әр қазақтың шаңырағында Қазақ радиосы саңқылдап, аға буынды күннің жаңалығынан хабардар етсе, жас жеткіншекті әсем ән мен тамылжыған күйге бөлеп, еңбектеген баланы әсерлі ертегісімен тербетті емес пе?! Дәл содан ләззат алып, талай жігіт пен бойжеткен арманға қол созды. Ал қырды асып, қой баққан қазақтың қанжығасында байланып жүрген радио жыр-дастанмен қойшыны да, кең иық даланы да әнге бөлегені рас. Міне, сол Қазақ радиосы күллі елдің жаңалығын жеткізсе, өңірдегі биылғы жылдың басты жаңалығы ретінде Жетісудың жеке радиосы ашылғанын айтуға болады.
Радионың ашылу салтанатында облыстық ішкі саясат басқармасының басшысы Болат Керімбек сөз сөйлеп, бұл ұлт үшін, Жетісу жұртшылығы үшін және жастардың тәрбие құралы екендігін айтты. Сонымен қатар, «Жетісу» радиосының жұмысына қоғам болып атсалысуымыз керектігін жеткізді. Игі шарада Қазақстанның Құрметті журналисі, облыстық «Жетісу» газетінің бас редакторы Әміре Әрін жүрекжарды лебізі мен ақ батасын арнады. «Радио ең бірінші ұлтқа қызмет етуі керек. Бұл тұрғыда «Жетісу» радиосының алар орны ерекше. Мұны неге айтып отырмын? Өйткені, «Жетісу» радиосының ашылуына көп еңбек сіңірген ең бірінші ұлттың ақмаңдай ұлына айналған Бейсен Құранбектің еңбегін айта кетуді жөн деп санаймын. Дәл сол бастаманы соңына дейін жалғастырып, Жетісудың үнін есіткен, бүгінгі телеарна басшысы Серік Әбікен, орынбасары Досан Қызайбекұлы және Есболат Айдабосынға үлкен алғысымды білдіремін. Еңбектерің жемісті болып, Бейсенжанның аруағы қолдасын!» — деді.
Көп жылдан бері облыс орталығы Талдықорған қаласында Жетісу радиосы ашылады деген хабарды еститінбіз. Бүгін сол айтулы күнге жеттік. Талдықорған қаласында Жетісу радиосы жеке хабар тарататын болды.
Жетісу радиосына журналист-жазушы Есболат Айдабосын жетекшілік жасайды. Бүгінде құрамында жеті адам қызмет істейді. Онда екі редактор, техник, музыкалық редакторлар бар. Радиоға басшылық етіп отырған Есболат Айдабосыннан жаңа ашылған радио жайлы сұрағанымызда мынадай жаңалықтармен бөлісті: «Жетісу радиосы таңғы сағат 7-ден бастап түнгі сағат 12-ге дейін хабар таратады. Жалпы 24 сағат жұмыс істейді. Онда бірнеше бағдарлама жарыққа шығады. Мысалға өткенімізден сыр шертетін «Тарих» бағдарламасы, бір әннің шығу тарихы жайлы «Ән-тарих» деген бағдарлама болады. Сонымен қатар, поэзия сағатына байланысты «Үркер» атты бағдарлама тыңдарманға ұсынылады. Тәрбиелік мәні зор «Ғибрат», жеке тұлғаларды насихаттауда, көпке немесе бір адамға шапағаты тиген адамдарды таныстыру бойынша «Шапағат», проза сағаты бойынша «Білте шамның жарығы», өлке шежіресінен сыр шертетін «Жерұйық» деген бағдарламалар жоспарланып тұр», – деді ол.
«Жетісу» радиосының алғашқы хабары тікелей эфирмен бастау алды. Онда облысқа және республикаға танымал тұлғалар радионың ашылуымен құттықтап, лебіздерін білдірді. Эфирде алғашқы болып ақын, халықаралық «Алаш» әдеби сыйлығының иегері Әміре Әрін үн қатты.
Жер жаннаты Жетісудың жеке үнжариясының ғұмыры ұзақ болғай!
Ришад ТҰРҒАНБАЙ
Алматы облысы
