Дүйім Қазақстан аумағында барыс жылының бастапқы тәуліктері дүрбелеңмен өтті. Батыстан бастау алған бейбіт шеру тасадан тас атушы күштердің ықпалымен бүлікке ұласты. Мұқым елдің тыныштығы ұрланды, далада оқ атылды, қалалар отқа оранды. Содырлар салған сойқанның соңы қаншама жазықсыз жандардың, әскерилер мен тәртіп сақшыларының ажалына әкеліп соқты.
Біз қазақ тектіліктен тамырын ажыратпаған, татулықтың тұғырын тік көтерген мемлекет екендігімізді осындай уақытта көрсеткеніміз абзал. Бір жағадан бас, бір жеңнен қол шығара отырып, бірлік туы астындағы бірегей тірлігімізге оралуымыз керек.
Ереуілге шыққан елдің талап-тілегі, ұсыныс-сұранысын қанағаттандыру мақсатында Мемлекет басшысы жедел шешімдер қабылдап, жаңаша өзгерістерге жол ашқандай. Оған «Қасіретті қаңтар сабағы: Қоғам тұтастығы – тәуелсіздік кепілі» атты баяндамасында айтқан сөздері дәлел бола алады.
Тірнектеп тапқаны талан-таражға түскен халық наразы. Әсіредіншілдер оңы мен солын ой таразысына салып үлгермеген жастарды үгіттеп, шаһарларда төңкеріс жасауға шақырды. Діттегендері орындалды, дүрбелең салдарынан орасан зор зардап келді, қарапайым халық жапа шекті. Берен мылтықтан безере атылған қорғасын оқ жазықсыз жандарға шүйлікті, жас жауынгерлер де ажал құшты. Содырлар салған сойқанның соңы ұлттық мүддені, мемлекеттік бүтіндікті бүлдіруге бағытталғанын анық көрдік. Оларға азық-түлік бағасының түсуі, әлеуметтік маңызды заттардың құнының арзандауы емес, билікке қол жеткізу, шаңырағымызды ойрандату ғана маңызды. Оған тоналған дүкен, өртенген көлік, бұзылып-шағылған ғимараттар дәлел.
Барлық дүрбелеңнің артында геосаясаттық мәселелер жатқандығы да жасырын емес. Сырт күштер террорлық-экстремистік әрекеттерімен мемлекеттік мекемелерді шабуылдап, бейбіт тұрғындарға оқ атуға дейін барды. Ақиқат астарын ақтарсаңыз мүлдем жат пиғылды жандардың ісі екендігі тайға таңба басқандай көрінеді.
Ендігі кезекте Мемлекет басшысының лезде қабылдаған шешімдерінің, яғни «Қасіретті қаңтар» сабағы: Қоғам тұтастығы – Тәуелсіздік кепілі» атты Үндеуіндегі батыл бастамаларға бет бұрсақ. Дүрбелең дауылы саябырсыды, енді соның себеп-салдарымен күресетін уақыт келді. Бұл ретте Президент, ең алдымен, қауіпсіздік тақырыбын тізгін етіп, алдағы уақыттағы экономикалық-әлеуметтік өрістеуіміздің басты бағыттарын көрсеткендей. Соның ішінде халық жағдайын тұрақтандырудың тың жолдары, ел қауіпсіздігі мен бүтіндігін сақтау шаралары, экспорт пен импортты өркендетудің жаңаша мүмкіндіктері, инвестиция тарту, орта және шағын кәсіпкерліктен нәпақасын тауып отырған жұртшылыққа демдесу, қаржы нарығын реттеу, жастар тәрбиесіне жіті назар аудару, білім беру жүйесін жандандыру, экстремизм-терроризм сынды әрекеттерге тосқауыл болу мәселелері елдің көңіл көкжиегіндегі дүниелерді дөп басқандай.
Жұрт тірлігіне жаңаша толқын, тың өзгерістер келе жатқандай. Үндеуде ең алдымен бұқараның ахуалы назарға алынып, жемқорлық атаулыны жоюға барынша күш салынатыны жеткізілді. Әсіресе, мемлекет көмегімен байып, қаржы-қазынасын шетелге тасыған шонжарлардың дүние-мүлкі есептеліп, тексерістер жүргізілетіні қуантты. Сонымен қатар «Қазақстан халқына» қорының құрылуының да өзектілігі жоғары. Қайырымдылыққа жақын меценаттар аталған қорға қаражат құюды бастап та кетті. Қомақты ақша ел игілігіне жұмсалып, қуанышын қалың жұртшылық көре түссе деген ниет бар.
Бізге қазір керегі – сабыр. Мемлекет басшысы тиісті шараларды қолға алды, кінәлілер жазалануда, бағалар бір жүйеге келтірілуде. Халықты билік естіді, енді билікті тыңдайтын мезет жетті. Арандатушылыққа ермей, татулық тұғырын теңселтпей береке-бірлікте ғұмыр кешейік.
Ұлжалғас ДҮЙСЕБАЕВА,
Алакөл ауданының
Құрметті азаматы
