Облыста төтенше жағдай жарияланып, шектеулер енгізілген тұста көп көкейінде «Халыққа қызмет көрсету орталығы жұмыс істей ме екен?» деген сауал болғаны сөзсіз. Бүгінде мекеме толық жұмыс істеп тұр және онлайн жүйеде де керекті құжаттарды алуға мүмкіндік бар.
– Талдықорғандағы Халыққа қызмет көрсету орталығы (ХҚО) 12 қаңтардан бастап штаттық режимде жұмыс істеп жатыр. Келушілерге барлық мемлекеттік қызмет қолжетімді. Ал жұмыс кестесі бойынша дүйсенбі-жұма күндері 09.00-ден 17.00-ге дейін үзіліссіз қызмет көрсетеді. Сондай-ақ, Талдықорғандағы автомобиль құжаттарын рәсімдеу орталығы және сектор жұмысы 17 қаңтардан бастап іске кірісті. Мемлекеттік қызметтердің 80 пайызын онлайн алуға, ал көлікті Kaspi және Halyk Homebank қосымшалары арқылы қайта рәсімдеуге болады. АвтоХҚО-ларда кезек тудырмау үшін осы сервистерді пайдалануға кеңес береміз, – дейді «Азаматтарға арналған үкіметтің» облыстағы филиал директорының орынбасары Әсем Тұқатова.
ХҚО ғимаратына Ashyq қосымшасы арқылы ғана кіре аласыз. Карантиндік тәртіп қатаң. Эпидемиологиялық жағдайға байланысты келушілер санитария ережелері бойынша арақашықтықты сақтап, бетперде тағуы міндетті. Мемлекеттік қызметтер бойынша қажетті ақпаратты 1414 бірыңғай нөмірі және @gov4c.kz, сондай-ақ, «Инста-грам» мен «Фейсбук» әлеуметтік желілеріндегі ресми парақшадан білуге болады.
Қали АСҚАР,
Алматы облысы
