«Өлеңге Жамбыл жүйрік, әнге Кенен, су жорға Үмбетәлі қара дөнен» деп, қазақ поэзиясының құлагері І. Жансүгіров жырлағандай, биыл Жетісу өңірінде туып-өсіп, соңына өшпес мұра қалдырып кеткен Үмбетәлі ақын мен Нұриланың айтысына 100 жыл толып отыр. Осы айтулы оқиғаны еске алып, өткен тарихқа көз жүгірту үшін сәрсенбі күні Ү. Кәрібаев атындағы әдеби-мемориалды музейінде «Жетісудың желмая ақындары» тақырыбында мәдени-танымдық іс-шара өтті. Іс-шараға аудан әкімінің орынбасары Ақниет Тұматаев пен жазушы, ақын, журналистер, мәдениет қызметкерлері қатысты.
Салтанатты іс-шарада сөз алған аудан әкімінің орынбасары Ақниет Тұматаев «Үмбетәлі мен Нұрила айтысының шоқтығы биік екендігі анық. Соған орай Үмбетәлі атамыздың еңбектерінің әлі де зерттеуді талап ететіні көрініп тұр. Бұл орайда зиялы қауым өкілдері бел шеше еңбек етеді деген сенімдеміз», – дей келе Үмбетәлі ақынның шығармашылығын зерттеп жүрген бір топ азаматқа облыстық М. Тынышпаев атындағы тарихи-өлкетану музейінің директоры Рысжан Аязбаеваның Алғыс хатын тапсырды. Шолаққарғалы ауылдық округінің әкімі Мақсат Керімбаев та өз тарапынан кешті ұйымдастырушылар мен музей қызметкерлерінің еңбектерін атап өтті.
Ақын, журналист, үмбетәлітанушы Нұрлан Әбдібек мазмұнды баяндама жасағаннан кейін Үмбетәлінің кіші қызы, бүгінде тоқсан жасқа келіп отырған Дәмегүл апаймыз әкесі жайында қызықты естеліктер айтты. ҚР мәдениет саласының үздігі, жыршы-термеші Жылбек Тоқтасынов Нұрила мен Үмбетәлі айтысының халық ақыны Әсімхан Қосбасаровтан жеткен нұсқасынан үзінді айтып берді.
Жазушы, халықаралық Алаш сыйлығының лауреаты, Президент атындағы сыйлықтың иегері Жұмабай Шаштайұлы: «Нұрлан Әбдібек бауырымыздың тың деректер мен оқиғаларды талдап жазуы, айтыстың әр нұсқасын түсіндіріп өтуі үлкен еңбек. Жалпы, бүгінгі кеш Үмбетәлі ақынның кішкентай музейінде өтсе де республикалық дәрежеде өтетін конференциялардан кем емес. Сол үшін музей қызметкерлері мен ақын ұрпақтарына алғыс айтқым келеді», – десе, филология ғылымдарының докторы Анарбек Бұлдыбай: «Иә, бұл айтыстың, Үмбетәлінің басқа да шығармаларының әлі де зерттеуді қажет ететіні сөзсіз. Биыл Жамбыл Жабаевтың 175 жылдығына орай 30 томдық жинақ жарық көрді. Сол 30 томның біріне біз Жамбылдың шәкірті Үмбетәлі Кәрібаевтың еңбектерін енгіздік. Бұл да болса біздің ақын алдында атқарған азаматтық борышымыз деп білеміз», –деп жиынды қорытындылады.
Мәдени іс-шараны Үмбетәлі Кәрібаев атындағы орта мектептің оқушылары ақын өлеңдерімен жалғастырды.
Рухани, тәрбиелік мәні бар бұл жиын Үмбетәлі Кәрібаев атындағы әдеби-мемориалдық музейінің қызметкерлері құрастырған, ақын ұрпақтарының демеушілігімен шыққан «Үмбетәлі мен Нұрила айтысына 100 жыл» атты кітабының тұсаукесер рәсімімен өз мәресіне жетті.
Кеш соңында Үмбетәлі ақынның ұрпақтары мәдени іс-шараға келген қонақтарға дастарқан жайып, ақын рухына құран бағыштап, ас берді.
Елдар Жақыпбеков,
Ү. Кәрібаев атындағы әдеби-мемориалдық
музейінің қызметкері
