Аудандық ішкі саясат бөлімі мен «Адам және қоғам» қоғамдық бірлестігінің мұрындық болуымен Талғар жоғары медициналық колледжінде «Тірегі сен тәуелсіздік төрінің, күш-қуаты егеменді еліңнің» атты тәуелсіздік құрдастарының форумы өтті.
Форумға аудандағы білім, құқық қорғау, өрт сөндіру, денсаулық, мәдениет, спорт саласы мен салық комитетінде еңбек ететін 1991 жылы дүниеге келген, яғни, тәуелсіздікпен құрдас 30 жас арнайы шақырылды. Олардың қатарында «Nur Otan» партиясы аудандық филиалы төрағасының бірінші орынбасары Бақыт Күрішбеков, аудандық жастар ресурстық орталығының жетекшісі Замира Қалымбетова, Өстемір ауылындағы мектеп директорының тәрбие ісі жөніндегі орынбасары Ержан Нүсіпжан бастаған іскер де белсенді жастар бар.
Форум жұмысы басталмас бұрын аудан жастарының жетістіктерін баян ететін көрме жұмысы таныстырылды. Салтанатты шарада аудан әкімі Қайдар Әбдіханов сөз сөйледі. Оның айтуынша, биыл жас мамандарды қолдау мақсатында «Дипломмен ауылға» жобасы аясында 34 маманға 9 млн. теңгеге көтерме жәрдемақы төленіп, материалдық-тұрмыстық жағдайын жақсартуға мүмкіндік берілген. Сонымен қатар, 21 жас маманның тұрғын үй сатып алуы үшін 91 млн. теңге жеңілдетілген несие берілуі де жастарға жасалып отырған қамқорлықтың айқын көрінісі.
Жиында сөз алған жас маман Нұргүл Сағындықова:
– Тәуелсіздіктің арқасында жастарға кең жол ашылды. Біздердің білім алуымызға, еңбек етуімізге, шетелдерге шығуымызға мол мүмкіндік жасалды. Өзім Абай атындағы Қазақ ұлттық педагогикалық университетінің құқықтану факультетін бітіріп, осы күні заңгер мамандығы бойынша Талғар медициналық колледжінде қызмет етудемін. Тәуелсіздіктің құрдасы болғаныма қуанамын, – деп жүрекжарды тілегін жеткізді.
Салтанатты шарада ауданның әр саласында белсенділік танытып жүрген жастар аудан әкімінің Алғыс хатымен және қаржылай сыйлықпен марапатталып, тәуелсіз елдің тірегіне айналған жалынды жастарға аудандық ардагерлер кеңесінің төрағасы Матан Бекбосынов ақ бата берді.
Ұлбосын ИСАБЕК
Талғар ауданы
Алматы облысы
