Таулы аймақта орналасқан Нарынқол өңірі ауылшаруашылығына қолайлы мекен. Табысын жер-анадан табатын ауыл халқы еңбек етуден еш жалыққан емес. Осы ретте жұмысын ерте көктемнен бастап, қоңыр күздің қара суығына дейін жүргізетін Нұрлан Стыбектовті ерекше атауға болады.
Қазіргі таңда ол «Алғазы» шаруа қожалығын құрып, өз жұмысын өркендетіп жүр. Ауылшаруашылығы мақсатында пайдаланатын трактор, комбайны мен толық агрегаттары бар техникалары жұмыстың өнімді болуына септігін тигізеді. Түздің тынымсыз жұмысына төселген Нұрлан ауыл халқының шабындық пен егістік алқаптарын уақытылы жыртып, алғыстарын арқалап жүр. Өз кезегінде техниканың бөлшектері мен оның жанар-жағармайын да назардан тыс қалдырмайды.
Сонымен қатар, дала жұмысының қиындығы мен қызығын қатар алып жүретін еңбек иесінің жұмыс істеп келе жатқанына 20 жылдан асты. Нұрлан Стыбековтің айтуынша, өзі басқаратын қожалықта 18 гектар суармалы жері мен 10 гектар алқапта астығы және 1 гектар жерде картоп өсіріп, өз кәсібін дөңгелентіп отыр. Біз де ел алғысын арқалаған Нұрланның ісіне сәттілік тіледік.
Е. АХМЕТЖАН,
Нарынқол ауылы,
Райымбек ауданы
