Көксу ауданында меценат ауыл тұрғындарына ғимарат салып беріп, онда тегін білім беру орталығын ашты. Жарлыөзек ауылында ашылған «Oshaq» тұрақты даму орталығының бастамашысы — заң ғылымдарының докторы, профессор Сарқытбек Молдабаев. Ол көп жылдар бойы құқық қорғау және сот органдарында жұмыс істеді. Қазіргі таңда ҚР Президенті жанындағы Мемлекеттік басқару академиясының Алматы облысы бойынша филиалында ғылыми және оқытушылық қызмет атқарады.
Оның айтуынша, ғимарат америкалық гранттар бағдарламасының қаражатына салынған және БҰҰ ресми түрде қабылдаған тұрақты даму саласындағы жаңа жаһандық бағдарламаны қолдау мен дамытуға бағытталған. Орталықтың қызметі ауылға экологиялық, экономикалық және әлеуметтік мәселелерді шешуге жәрдемдесуге, сондай-ақ, ауыл тұрғындарына кешенді қолдау көрсетуге арналған. Қойылған міндеттерді жүзеге асыру үшін Сарқытбек Молдабаев «Oshaq» тұрақты даму орталығы» қоғамдық бірлестігін құрды.
– Барлығы ошақтан басталады. «Отбасы – ошақ қасынан» дейді. Сондықтан, орталық «Oshaq» деп аталады. Ғимаратты халық мұқтаждығы үшін салынғанын атап өткім келеді. Бірінші кезекте ауыл тұрғындары түрлі мәселелер бойынша ақпарат пен кеңес алып отырады. Мысалы, заң мәселелері, бизнес ашу, мемлекеттік қызметтер алу, жұмысқа орналасу және тағы басқалар. Сондай-ақ, мұнда цех пен жабдықты қойып шағын кәсіпорын ашуға, этно және экопарк құруға, түрлі үйірмелер мен секциялар ашуға мүмкіндік бар. Дамыған мемлекеттерде қоғам, әр отбасы тұрақты дамумен айналысады. Отбасы үшін тұрақты даму бізден кейін болашақ ұрпақ үшін ресурстар қалатындай етіп соншалықты тұтыну деген сөз, – деді меценат.
«Oshaq» білім беру орталығында ауыл тұрғындарын компьютерлік сауатқа тегін оқытатын қазақ-американдық білім беру орталығы жұмыс істейді. Мысалы, Қызыларық ауылындағы орта мектеп оқытушысы Аманбек Әлдибеков аптасына екі рет балалар мен ересектерді компьютерлік сауаттылық негіздеріне үйретіп келеді. Сондай-ақ, алдағы уақытта орталықта egov.kz арқылы мемлекеттік қызметтерді алу үшін өзіне-өзі қызмет көрсету бұрышын ашу жоспарлануда.
Сарқытбек Молдабаев отбасымен бірге туған ауылын дамыту ісін одан ары жүргізуге ниетті. Ол алдағы уақытта әлі талай сәулетті ғимараттар салып, ауылдастарының мәдениеті мен өмірін өркендетуге үлес қосуды жоспарлауда.
Қажет АНДАС
Алматы облысы
