Қапшағай қаласында төрт баланың анасы Дина Абселемова мемлекеттік бағдарлама бойынша кәсіпкерлік негіздерін үйреніп, бухгалтерлік аутсорсинг қызметін көрсететін жеке компаниясын құрды.
Дина өткен жылы Кәсіпкерлер палатасы «Еңбек» мемлекеттік бағдарламасы аясында өткізетін «Бастау бизнес» кәсіпкерлік негіздері жобасын аяқтаған. Оқуын сәтті тамамдап, бизнес-жобасына 200 айлық есептік көрсеткіш көлемінде мемлекеттік грант алды. Бұл қаражатқа ол бухгалтерлік аутсорсинг қызметтерін көрсететін жеке компания ашты. Қазіргі таңда шағын компания штатында бес қызметкер бар. Дина Абселемованың мамандығы қаржыгер. Ол мемлекеттік қолдаудың арқасында кәсіпкерлік негіздеріне оқыған.
Аутсорсинг компниясы заңды және жеке тұлғаларға бухгалтерлік қызметтер көрсетеді. Түрлі бағыттағы 20-дан аса компанияның бухгалтерлік есептерін жүргізеді. Жақын жылдары нарықта аутсорсинг компанияларының үлесі арта түспек. Себебі, шағын кәсіпкерлік субъектілеріне штатта бірнеше бухгалтер, қаржыгер сынды қызметкерлерді ұстау тиімсіз.
– Жалпы, тек микробизнес қана емес, ірі компанияларда бірқатар қызметті аутсорсингке аударуда. Сондықтан нарықта сұраныс бар, бұл бағыт дами береді деп ойлаймын. Бастысы, қызмет көрсету сапасын үнемі жетілдіріп, компанияның табысты бола түсуіне үлес қосу керек. Сонымен бірге мамандар заманға сай шұғыл түрде қызмет атқаратын, өзі ісіне, адал, жауапты болуы тиіс, – деп атап өтті кәсіпкер.
«Атамекен» кәсіпкерлер палатасының бизнес-тренері Мейірман Сауранбековтың айтуынша, биыл Қапшағай өңірінде «Бастау бизнес» жобасын 58 адам аяқтап, қазіргі таңда 30 қатысушы оқуын жалғастыруда. Соның ішінде 13 азамат өз ісін дамыту үшін 200 АЕК көлемінде грант алды.
Айгүл Байжұмақызы
Қапшағай қаласы
