Сарқан ауданына жұмыс сапарымен келген Қазақстан Республикасы Парламенті Мәжілісінің депутаттары Данияр Әлімбаев пен Әлия Әбсеметова алдымен «Nur Otan» партиясы Сарқан аудандық филиалының ғимаратында қоғамдық қабылдау өткізді.
Қоғамдық қабылдауда аудандық мәслихат депутаттары Бірлік, Теректі ауылдарында жоспарланған мектептердің құрылысын жүргізуді, Көктерек ауылында Мәдениет үйін күрделі жөндеуден өткізуді және өңіріміздегі тау туризмін дамытуға ықпал ететін Теректі-Жалаңаш бағытындағы жолды жөндеу жұмыстарын қаржыландыру сынды бірқатар мәселелерді көтерді. Барлық нысандар тиісті мемлекеттік сараптамадан өтіп, жобалық- сметалық құжаттары әзірленген, тек қаржы жағы қолбайлау. Өз кезегінде халық қалаулылары тиісті облыстық басқарма басшыларына ұсынысхат жазып, республикалық бюджеттен қаржы қарастырылуына ықпал етуге уәде берісті. Қабылдау соңында меймандар аудандағы әріптестерімен өңірдің дамуы жайында ашық пікір алмасып, емен-жарқын әңгімелесті.
Халық қалаулылары аудан орталығында бой көтеріп жатқан 5 қабатты 50 пәтерлі жалгерлік тұрғын үйдің құрылыс жұмыстарыменде танысты. Мердігер компания өкілдерімен жүздесіп, сапа жағына баса мән беруге шақырды.
Сапар барысында Мәжіліс депутаттары «Nur Otan» партиясы Сарқан аудандық филиалы жанынан құрылған Жұмыспен қамту және әлеуметтік осал топтарды қолдау, отбасы, әйелдер және балалардың құқықтарын қорғау мәселелері жөніндегі кезектен тыс қоғамдық кеңестің отырысына қатысты. Н. Островский атындағы мектеп лицейдің директоры Бақытгүл Сәрсембаева, Черкасск орта мектебі директорының тәрбие ісі жөніндегі орынбасары Дархан Елубаев оқушыларға берілетін құқықтық тәрбие жайында баяндама жасады. Мектептерде орын алған түрлі келеңсіздіктер оқу орнындағы психологтармен, жауапты мамандармен жұмысты күшейтуді талап етеді. Осы мәселеге «Nur Otan» партиясы облыстық филиалы төрағасының бірінші орынбасары Гүлнар Тойлыбаева жиын қорытындысында баса назар аударып, бала құқығын қорғауда аталмыш қоғамдық кеңес жұмысының маңызды екендігін айрықша атап өтті. Басқосуда Данияр Әлімбаев пен Әлия Әбсеметова балалар құқығына, қауіпсіздігіне қатысты Парламент қабырғасында көтеріліп жатқан мәселелер турасындағы мәліметтермен бөлісті.
П. Жеңісхан
Сарқан ауданы
