Ескелді ауданында «Жетісу — Ұлы Жібек жолының басты қақпасы» атты қолөнершілердің қайырымдылық көрме-жәрмеңкесі өтті. Онда аймақтың әр түкпірінен келген шеберлер қолдан жасалған бұйымдарын ұсынды. Бұл туралы «Жетісу» газетінің тілшісі хабарлады.
Ел тәуелсіздігінің 30 жылдығына арналған көрмені Ескелді ауданының әкімдігі «Алтын Адам Жетісу шеберлер орталығы» қоғамдық бірлестігі, облыстың Іскер әйелдер кеңесі, облыстық кәсіпкерлер палатасының аудандық филиалы, «Алпамыс» мүгедектер қоғамдық бірлестігімен бірлесіп ұйымдастырды.
– Көрменің мақсаты – қолөнер шеберлігін дәріптеу, оны халық арасында өзекті ету, қолөнершілерге тәжірибе алмасу жағдайын жасау. Бірқатар шеберлер мемлекеттік бағдарламалардың қатысушылары, соның арқасында өз ісін дамытып, шеберлік сабақтарын өткізеді. Сондай-ақ, олар ұлттық қолөнерді ары қарай жалғастыру және сақтау үшін балалары мен немерелеріне үйретіп келеді. Облыстағы көптеген қолөнерші «Алтын адам Жетісу шеберлер орталығы» қоғамдық ұйымына біріккен. Олардың ұлттық өнерді бұқараға танымал ету бастамасы қуантады, – дейді облыстың іскер әйелдер кеңесінің төрайымы Римма Салықова.
Ашылу салтанатында аудан әкімі Рустам Әли халық қолөнерінің зор әлеуетін атап өтті.
– Халықтық қолөнер ұлттық мәдениет пен туризм индустриясының ажырамас бөлігі. Елдегі туризмнің дамуын, туристік орындардың танымалдығының артуын ескерсек, қолөнер кең тарала бастайды. Бұл үрдісті күшейтіп, ұлттық қолөнерді ілгерілету үшін түрлі алаңды ұсына отырып, жаңа деңгейге көтеруіміз керек, – деді ол.
Жәрмеңкеге келген шеберлер қолдан жасаған заттарын көпшілік назарына ұсынды. Онда зергерлік, киіз және жібек бұйымдар, тоқыма және былғарыдан жасалған заттар, музыкалық аспаптар, ат әбзелдері, картиналар болды. Жиналған қаражаттың бір бөлігі киіз бұйымдарына керекті шикізат сатып алу үшін ерекше қажет ететін шеберлерге көмекке бағытталмақ.
Жәрмеңкеге қатысушылардың бірі – Сәуле Жүлкеева. Сәуле Талдықорған қаласында ұлттық нақыштағы әшекейлер жасайтын шебер.
– Мен зергерлік бұйымдарды табиғи тастардан жасаймын. Идея мен дизайнды түрлі жұмыстарға қарап, өзім ойлап таптым. Барлық өнім заманауи дизайндағы шығыс және ұлттық стильде әзірленген. Әрбір бұйым бірегей, қайталанбайды деп айтуға болады. Өйткені олар қолмен жасалады, – дейді қолөнер шебері Сәуле Жүлкеева.
Ал Сарқан ауданының тұрғыны Светлана Бестюбаева үшін бұл алғашқы көрме. Ол қыз жасауы мен көрпе-жастық және кілемдер жасайды.
– Бес жыл бұрын көрпе тігіп, қыздарыма жасау дайындай бастадым. Менің тіккендерімді көріп, туыстарым мен таныстарым тапсырыс бере бастады. Осылайша хоббиім кәсіпке айналды. «Еңбек» мемлекеттік бағдарламасы бойынша кәсіпкерлік негіздерін оқып, бизнес ашуға грант алдым. Осы қаражатқа тігін машинасы мен құрал-саймандар сатып алдым. Содан бері бизнесті дамыту бойынша белсенді жұмыс істеп келемін. Әзірлеген дүниемді Instagram-ға салып отырамын. Ұйымдастырылған көрмеде басқа да шеберлермен пікірлесіп, тәжірибе алмастым, – дейді ол.
Көрме жұмысы аясында шеберлік сыныптары, ұлттық киімдер көрсетілімі және концерттік бағдарлама ұйымдастырылды.
Айгүл БАЙБОСЫНОВА
Ескелді ауданы
Алматы облысы
