Қайырымдылық жасау да аспандағы күн секілді, бұлт астынан жарқырай шығып, жер бетіндегілерге мейірімі мен шуағын қоса төгіп тұрады. Арамызда сол күн тәрізді адамдарға әр кез көмек қолын созып, айналасындағыларға үнемі көмектесіп жүретін, соған орай әлеуметтік жауапкершілікті терең түсінетін адамдар аз емес. Яғни, жақсылық жасауды жаны сүйетін азаматтар арамыздан әрқашанда, әруақытта табылады.
Халқымызда «Не берсең де балаға бер, бәрін бала үшін жаса» деген дана тұжырым бар. Сондай жақсылыққа құштар жандардың бірі – ерекше білім беруді қажет ететін балалардың тағдырына бейжай қарамай, қолынан келгенінше көмек қолын созып жүрген «Deltal-IT» жауапкершілігі шектеулі серіктестігінің директоры Роман Владимирович Чапленконың жасаған ізгі ісін айтсақ болады. Ол осы жақында ғана Қаскелең қаласындағы облыстық зерде бұзылыстары бар балаларға арналған арнайы мектеп-интернатының спорттық ойын алаңына заман ағымына сай толық жөндеу жұмыстарын жүргізіп берді. Ізгілікті де сауапты істерді атқарып жүрген Роман Владимировичтің спорттық ойын алаңын жаңартып беруі еліміздің спорт саласын дамытуға қосқан өзіндік үлесі деп білеміз.
Спорттық алаң футбол, волейбол ойындарын ойнауға арналған. Қазіргі күнде аталған мектеп-интернатта ерекше білім беруді қажет ететін 157 оқушы білім алуда. Оқушыларымыз жыл сайын спорттық жарыстарда топ жарып жүр.
Мектебімізде Халықаралық «Жұлдыз-ай» балалар шығармашылығы фестивалі спорттық байқауларының жеңімпаздары бар. Алдағы уақытта балдырғандарымыздың бұл орайдағы жетістіктерінің молая түсетіндігі сөзсіз.
Мектеп әкімшілігі мен оқушыларымыздың атынан оқу ордасына заманауи спорттық ойын алаңын сыйлаған Роман Владимирович Чапленкоға шексіз алғысымызды білдіреміз.
Зерде бұзылыстары бар балаларға арналған
облыстық арнайы мектеп-интернат әкімшілігі
Қаскелең қаласы
