Жетісулық Нұрас Тәлім гидропоника көмегімен жасыл жемшөп өсіре бастады. Гидропоника – топырақты пайдаланбай құрама жемге балама бола алатын экологиялық таза өсімдікті өсіру.
26 жасар Нұрас кәсібін мемлекеттік бағдарламаға қатысудың арқасында бастап отыр. «Атамекен» кәсіпкерлер палатасының мамандары жас кәсіпкерге идеясын іске асыру үшін «Бастау Бизнес» кәсіпкерлік негіздері жобасы бойынша оқытудан өтіп, кейін мемлекеттік грант байқауына және жеңілдетілген несиелендіру бағдарламасына қатысу мүмкіндігін ұсынды.
Кәсіпкер Талғар ауданының Қарабұлақ ауылында тұрады. Негізгі мамандығы инженер-техник және автоэлектрик. Алайда, мамандығы бойынша ұзақ жұмыс істемеді. Себебі, кәсібін ашып, өзіне жұмыс істеуге және қаржылай тәуелсіз болуға ұмтылды.
– Кәсіпкер болу мақсатым еді. Қоғамға бір пайдамды тигізіп, алға қойған армандарымды орындағым келетін. «Бастау Бизнес» жобасына келіп, өзімнің алға қойған мақсатыма бір қадам жасадым деп ойлаймын. Осылайша, қиындығы мен қуанышы қатар жүретін кәсіпкерлікпен айналысуға бел будым. Ұзақ уақыт бойы айналысатын бизнестің түрін зерттеп, гидропоника сияқты инновациялық бағытты таңдадым. Бұл сала біздің елде енді ғана дамып келеді әрі әлеуеті жоғары, – дейді жас кәсіпкер.
Өткен жылы Нұрас «Бизнестің жол картасы – 2025» бағдарламасы бойынша гранттар байқауына қатысты. Оның өсіп келе жатқан дәнді пайдаланып, гидропоникалық жасыл жемшөп өсіруді ұйымдастыру және оны түйіршіктеу жобасы инновациялық деп танылып, 2,5 миллион теңге көлемінде грант бөлінді.
Кәсіпкердің айтуынша, қаражатқа шағын жылыжай салып, гидропоникалық қондырғы мен жабдықтар, дәндер сатып алынды. Қазір жылыжайда арпа, бидай және жүгерінің бірнеше түрі өсіріледі. Сонымен қатар бидай өскіндерінен дәрумендер шырыны алынады. Шағын жылыжайдың айына бір тоннаға дейін жемшөп өсіруге қауқары бар. Шөп топырақсыз өсірілетіндіктен қосымша салымды қажет етпейді. Тек жылыжайда әрқашан ерекше микроклимат сақталуы керек.
– Инновациялық жобамызға бірнеше ай ғана болды. Өткен жыл соңынан бастап жұмыс істеп келеміз. Қазір серіктестермен әріптестікті жолға қоюдамыз және бірқатар мүдделі сатып алушыларымыз бар. Жалпы, жасыл жемшөп малдың негізгі тамақтануына арналған жем қоспасы. Гидропоникада өсірілген жасыл жемде малға қажетті барлық қоректік заттардың бар екені дәлелденген. Сондықтан пайдалы әрі сіңімді ас болады. Ең бастысы, құрама жемге балама бола алатын экологиялық таза өнім, – дейді Нұрас.
Енді кәсіпкер өңірдегі ірі мал шаруашылығы кешендерімен ынтымақтастықты дамытпақ. Сондай-ақ, келесі жылы малға арналған түйіршіктелген жасыл жемшөп өндірісін ашуды жоспарлап отыр.
Айгүл БАЙБОСЫНОВА
