Ыбырай Алтынсариннің «Мектептің жүрегі – жақсы мұғалім» деген даналық сөзі өмірі өнегеге толы ұстаз Кенжетай Қазыбаеваға қарата айтылғандай. Биыл 60 жасқа толып отырған ұлағатты жан өзі туып-өскен Қоянкөз ауылында қырық жылға жуық ұстаздық етуде.
Көпшілік ортада адамгершілік қасиеті, қарапайымдылығы, қайырымдылығы, адалдығымен ардақталған ұстаздың өмір жолы тек қана өрлеу соқпағынан тұрады. Өзіндік ізденісі, терең ойымен оқушыларын да, әріптестерін де баурап алатын ұстазға тереңге бойлай білетін қасиет пен үйренуден де, үйретуден де жалықпайтын ерекшелік тән. «Шығармашылық шыңға жеткізеді» деген ұстанымға берік ұстаз ізденісті еңбегінің нәтижесінде Қаныш Сәтбаевтың 110 жылдығына орай өткен облыстық «Ғұламалардың ғұламасы» ғылыми-тәжірибелік конференциясында «Дара ғалым – дана ғалым» тақырыбындағы баяндамасымен І дәрежелі диплом иеленді.
– Бұл байқауға 36 ұстаз қатысты, барлығы да іріктелген мықтылар еді. Ғалымның қызы Мейіз Сәтпаеваның және академиктердің келуі бізге шығармашылық қанат бітіргендей болды, – деп мақтанышпен еске алады сол күнді апайымыз. Облыстық «Биология пәні мұғалімі – 2001» байқауына да қатысып, ІІ дәрежелі дипломға ие болып, мектеп абыройын асқақтатқаны тағы бар.
Ұстаздың іс-тәжірибесі «Биология-химия сабақтарында ҰБТ-ға даярлау барысында жаңа әдіс-тәсілдерді пайдалану» атты облыстық тәжірибелік семинарда таратылды. Ақпараттық технологияларды қолдану негізінде жаңа талапқа сай жабдықталған кабинеттің оқу-тəрбие үрдісіне қажетті барлық зертханалық жұмыстарын SPARK құрылғысына қондырып, аудандық пән мұғалімдерінің семинарларында бір жылдың ішінде бірнеше мәрте шебер сынып сабақтарын өткен кездері де болды. Облыстық әдістемелік кабинеттің ұйымдастыруымен «Оқушыларды ҰБТ-ға дайындаудың әдістемелік ұйымдастыру мәселелері» атты жинақ кітапшасында да еңбегі жарияланды.
Ақындықтың бойына даруы да ұстаз қасиеттерінің бір қыры. Оны «Өнер, өлең маған жақын, болмасам да үлкен ақын» деп басталатын өлең жолдарынан білуге болады.
Мектепте тәрбие мен білім – егіз. Осы тізгінді тең ұстаған Кенжетай Қабдолдақызы еңбек жолында 6 бірдей сыныпты мектеп табалдырығынан жаңа өмірге ақ жол тілеп аттандыруы да қызығы мен шыжығы ұстазға ғана мәлім зор белес.
«Ұстаздан шәкірт озар» дегендей, оқушылары да мектеп атын шығарып, аудан, облыс, республика көлемінде көптеген жетістікке жетті. Атап айтар болсақ, облыстық экологиялық «Табиғат мерекесінде» оқушысы Маржан Сайлыбаева І дәрежелі дипломмен, «Туған табиғатты аялайық» атты республикалық экологиялық танымдық байқауда Таңшолпан Байзақ ІІ дәрежелі дипломмен марапатталды. Облыстық пән олимпиадасында Айжан Сайлыбаева ІІ орынға, Метербай Сағындық ІІІ орынға, Қалиасқар Аяулым ІІ орынға ие болды. Мектептен түлеп ұшқан шәкірттері еліміздің әр түкпірінде жемісті еңбек етуде.
Білім кеңістігінде өзіндік орнын ойып алған ұстаздың еңбегі де еленбей қалған жоқ. Әр жылдары «Қазақстан Республикасы білім беру ісінің үздігі», «Қазақстан Республикасы Тәуелсіздігінің 10 жылдығы» мерекелік төсбелгісімен, «Тәуелсіз Қазақстанның рухани және әлеуметтік дамуы жолында қол жеткен табыстары және оның гүлденуіне қосқан үлесі үшін» ҚР Білім және ғылым министрлігінің Құрмет грамотасымен марапатталды. «Кербұлақ ауданының Құрметті азаматы» атанды.
Айтолқын Иманбекова,
Т. Құлыбеков атындағы орта мектеп-шағын орталығының оқу-тәрбие ісінің меңгерушісі
Қоянкөз ауылы,
Кербұлақ ауданы
