Талдықорғандағы Салтанат сарайында Қазақстанның жауынгерлік өнер және қазақ күресі қауымдастығының өкілдері облыс спортшыларымен кездесті. Оған аймақ басшысының орынбасары Рустам ӘЛИ қатысты.
Шараны бастан-аяқ жүргізіп отырған Рустам Әли:
– Облыс спортшыларымен кездесуге Нұрсұлтан қаласынан Қазақстанның жауынгерлік өнер және қазақ күресі қауымдастығының өкілдері, қадірлі қонақтарымыз Абат Имамбаев, Берік Құнанбаев, Мәулен Мұсабек, Ербол Мырзабосынов және Ерлан Естек арнайы келіп отыр. Аймағымызда спорт қарыштап дамып келеді. Облысымыздың барлық өңірлерінде спорт нысандары салынуда. Алдағы уақытта да игі бастама жалғасын табады, – деді.
Осыдан кейін облысымыздағы жауынгерлік өнер, өрендеріміздің спорттағы жетістігі жайлы бейнеүзінді көрсетілді.
Шара барысында Қазақстанның жауынгерлік өнер қауымдастығы мен қазақ күресі қауымдастығының бас директоры Абат Имамбаев сөз алды «Қос қауымдастық бірігіп, бұқаралық спортты дамыту мақсатында еліміздегі барлық өңірлерді аралап жүрміз. Біздің мақсатымыз – салауатты өмір салтын насихаттап, жастарды спортқа тәрбиелеу. Жетісудан ел намысын қорғаған небір мықты, талантты өрендер шыққанын білеміз. Облыс әкімінің қолдауымен үлкен ғимараттар салынуда», – деп облыстың жетістігіне тоқталды. Сонымен қатар, қазақ күресінің ережелерінде үлкен өзгерістер болып жатқанын, енді балуандарымыз батыр бабаларымыз сияқты жалаңаяқ күресетінін айтты. Тағы бір қуаныштысы, төл спортымыздың Назарбаев зияткерлік мектебінде арнайы сабақ болып өтетінін хабарлады. Алдағы уақытта мектеп бағдарламаларына да енгізу жоспарда бар екенін жекізді.
Жиында Қазақстан жауынгерлер қауымдастығының қызметі және қазақ күресі федерациясының атқарған жұмысы кеңінен талқыланды. Сондай-ақ, қазақ күресін дамыту, кемшін тұстары жайлы бірқатар мәселелер көтеріліп, ұсыныстар тыңдалды. Бұл жөнінде облыс әкімінің орынбасары: «Жиында талқыланған мәселелер алдағы уақытта қарастырылады. Бірлескен арнайы іс-шаралар жоспарын әзірлеп, әрі қарай жұмысты жандандырамыз», – деді.
Соңында қауымдастық мүшелері өңіріміздегі спорт нысандарын аралап, «Өркен» спорт кешенінде жалауы желбіреген жекпе-жек спортын – жастар мен жасөспірімдер арасындағы ел біріншілігін тамашалады.
А. НАЗАРҰЛЫ
