Бүгін — қазақ әдебиетінің қайталанбас классиктерінің бірі, дауылпаз ақын Есенқұл Жақыпбектің туған күні.
Қасиетті қара домбырасын құшақтап, айтыс өнерін шырқау шегіне жеткізген, бекзат болмысына сай барақатты ғұмыр кешіп, қаламды да жанына серік етіп, сыршыл өлең тудырған, иісі Алаш жұртының жүрек төрінен тұғыр сайлаған тұғырлы тұлғаның туған күнін жетісулықтар таңмен таласа мерекелеп кетті.
«Көк шыққанға бір қуанып, шөп шыққанға бір қуанып, өмір өтті зырғып ағып», — деп сынаптай сусыған тіршілік ырғағына қарата саф жыр түлеткен Есенқұл Жақыпбекке «Jetisý» телеарнасының «TAŃJARYQ» бағдарламасы арнайы хабар арнады. Ақынның сөзіне жазылған ғажайып әндер әуелеп, оқырмандарға шайыр шығармашылығынан сауалдар қойылды.
Хабарға көрнекті ақын, Алматы облыстық «Jetisý» газеті бас редакторының орынбасары Нүсіпбай Әбдірахым, айтыскер ақын, «Алатау» гезетінің бас редакторы Айтақын Бұлғақов арнайы қонақ болып, Ес-ағаның бедерлі ізі, шығармашылығы мен рухани болмысы туралы тебірене әңгімеледі.
Сахнада елдің мұңын мұңдап, жырын жырлаған айтыс ақтаңгері қарапайым ғұмыр кеше жүріп, қаймана жұрттың сөз өнеріне өз қазынасын молынан қотарды. Елін ерекше сүйді. Туған жердің түп жусанына дейін жанарымен аймалап, алақанымен аялады. Тұғырлы елдің ғана емес, табиғаттың да перзентіне айналған Есенқұл Жақыпбек шын мәнінде халық ақыны еді.
Дара тұлғаның сара жолын ой сарабына салып, өмірде Ес-ағамен дос, аға-бауыр болып етене араласқан, рухани пікірлес болған Нүсіпбай Додабайұлы мен Айтақын Мұхамедиұлы ақтаңгер өмірінен есті естеліктер айтысты. Өз кезегінде, «TAŃJARYQ» бағдарламасының қонақтары ақынның баспа бетінен жуырда ғана жарық көрген «Алуан ойлар» атты балаларға арналған өлеңдер кітабы мен «Ғашық жүрек ғазалдары» лирикалық жыр жинағының тұсаукесер рәсімін өткерді. Ақынның бір өлеңін оқып, кітапты таныстырып өтті.
Айта кетерлігі, Есенқұл Жақыпбектін қос кітабы ақынның рухани шәкірті Айдос Майлыбаевтың демеушілігімен 1000 дана болып оқырманға жол тартып отыр. «Алуан ойлар» балаларға арналған кітабында шымшыма ойлар, мағыналы тақпақтар топтастырылса, аталмыш екінші кітапқа мәңгілік тақырып — махаббатқа арналған ақынның таңғы шықтай туындылары басылған.
Тірісінде ешқандай кұжат-қаулысыз-ақ ел жүрегінен ойып орын алған Есенқұл «халық ақыны» атанып кетті. Алпысқа аяқ басқан шағында салалы саусағынан қаламын сусытып алған ақын соңына мол мұра қалдырып үлгерді.
Асыл СҰЛТАНҒАЗЫ
Фото — автор
Алматы облысы
