Білім және ғылым министрлігі Ғылым комитетінің сейсмикалық станциялар желісі Алматы уақытымен 21 сағат 39 минутта Райымбек ауданында жер сілкінісін тіркеді. Бұл туралы «Жетісу» газеті мәлімдеді.
Жер сілкінісінің эпицентрі Алматы қаласынан 255 шақырым жерде, Алматы облысының Райымбек ауданында (картада Алматыдан тіке есептегенде Қарасаз маңы көрсетілген) орналасқан. Жер сілкінісінің энергетикалық класы — 8.8. MPV магнитудасы — 3.9. Эпицентрдің координаттары 43.11° с.ш. 80.05° в.д. Тереңдігі — 25 шақырым. Сезілетіндігі туралы мәліметтер (МЅК-64 шкаласы бойынша): жоқ.
Бүгін, 9 ақпан — Мұқағалидың туған күні. Ақынның туған күні қарсаңындағы жер дүмпуін не деуге болады?
Алматы облысы төтенше жағдайлар департаменті ақпаратты алғаннан кейін жергілікті атқарушы органдарды, полиция департаментін, «Қазселденқорғау», прокуратура және басқа да ұйымдарды хабардар етті. Сеніп тапсырылған аумақтардағы жағдай нақтылануда, құрбандар туралы хабарлама түскен жоқ.
Осыған байланысты Алматы облысының ТЖД жер сілкінісі кезіндегі әрекеттердің тәртібі туралы ескертеді:
— ғимараттан шығыңыз (сіздің иелігіңізде 15-20 секунд);
— жоғарғы қабаттарда қалған жағдайда баланы құшақтап алып, есік ойығының орнына немесе іргелі қабырғалардан құралған бұрышта орын алып тұрыңыз;
— ешқандай жағдайда терезе жанында тұрмаңыз және балкондардан секірмеңіз.
— ғимараттардан, құрылыстардан, бағаналар мен қоршаулардан алыс тұрыңыз;
— үйге кірмеңіз: дүмпулер қайталануы мүмкін;
— жеделсатыны пайдаланбаңыз;
— сіріңке, шам жағуға болмайды;
— сымдарға қол тигізбеңіз;
— зардап шеккендерге алғашқы көмек көрсетіңіз.
«ЖЕТІСУ-АҚПАРАТ»
