Өртте адамдарды құтқару кезінде көрсеткен батылдығы, ерлігі мен жанқиярлығы және қызметтік міндеттерін адал атқарғаны үшін бір топ қызметкер марапатталды. Бұл туралы «Жетісу» газеті хабарлады.
Атап айтқанда, «Төтенше жағдайдағы ерлігі үшін» төсбелгісімен, ҚР Төтенше жағдайлар министрінің Алғыс хатымен және Алматы облысы әкімінің Құрмет грамотасымен медицина қызметкерлері, Алматы облысының ТЖД қызметкерлері марапатталды.
Марапатталғандар — 2021 жылы 14 қаңтарда Талдықорған қаласының көппәтерлі тұрғын үйінде өрт шыққан кезде ерен ерлік көрсеткендер. Өртті сөндіру бойынша жедел қабылданған шаралар барысында Алматы облысы ТЖД қызметкерлері жанып жатқан және түтін басқан пәтерден 4 адамды шығарды, оның ішінде ес-түссіз күйдегі екі бала болды. Құтқарылғандарды жедел медициналық жәрдем қызметкерлері қабылдап алып, өз кезегінде олар да зардап шеккендерге жедел әрі білікті алғашқы медициналық көмек көрсетті.
Өрт сөндіру бөлімшелерінің жеке құрамы мен медицина қызметкерлерінің кәсіби және шебер іс-әрекеттерінің арқасында зардап шеккендер қаза болған жоқ.
Төрт адамды құтқарғаны үшін, сондай-ақ, өртті сөндіруді ұйымдастырғаны, уақытылы эвакуациялағаны және медициналық көмек көрсеткені үшін ТЖД екі қызметкері «Төтенше жағдайдағы ерлігі үшін» төсбелгісімен, жедел медициналық жәрдемнің төрт қызметкері және ТЖД-ның екі қызметкері ҚР ТЖМ Алғыс хатымен, ТЖД бір қызметкері Алматы облысы әкімінің Құрмет грамотасымен, ТЖД екі қызметкері Алматы облысы әкімінің Алғыс хатымен марапатталды. Сондай-ақ, Алматы облысы ТЖД марапатталған қызметкерлеріне Алматы облысы әкімінің атынан қолсағаттар табысталды.
«ЖЕТІСУ-АҚПАРАТ»
