Текелі қаласының әкімдігі тұрғындарға қысқы жылыту маусымына алдын ала дайындалып, қажетті отын қорын ертерек алуды ұсынды, – деп хабарлайды 7-su.kz ақпараттық порталы.
Қала аумағында тұрғындарды сапалы отынмен тұрақты қамтамасыз ететін екі көмір қоймасы жұмыс істейді. Атап айтқанда, бұл бағытта «Рустамов» пен «Мадина» жеке кәсіпкерлері қызмет көрсетеді. Қазіргі уақытта аталған қоймаларда 1750 тоннадан астам көмір қоры жинақталған. Тұрғындарға ұсынылып жатқан отын түрлерінің бағасы бекітілген тарифке сәйкес келеді. Атап айтқанда, «Семей» көмірінің бір тоннасы 24 мың теңге тұрса, «Шұбаркөл» көмірі 26 мың теңгеден сатылуда.
Қысқы маусымда отын тапшылығын болдырмау және үйдегі жылу жүйесінің қалыпты жұмыс істеуін қамтамасыз ету үшін мамандар көмірді ертерек сатып алуға кеңес береді. Тұрғындар қоймаларға тікелей хабарласып, қажетті мөлшердегі отынды үйге жеткізу қызметі арқылы ала алады. Жергілікті атқарушы органдар жылыту маусымының штаттық режимде өтуін қатаң бақылауда ұстап отыр. Уақтылы жасақталған отын қоры қыс күндері әрбір отбасының жайлылығы мен қауіпсіздігіне кепілдік береді.
