2016 жылдан бері дәстүрлі түрде өткізіліп келе жатқан орталық атқарушы органдар басшыларының, әкімдердің, ұлттық жоғары оқу орындары ректорларының халық алдындағы кезекті есебі Қарасай ауданында да бастау алды. Бұған дейін 1-май, Шамалған және Жандосов ауылдық округтерінде өткен мұндай шара сәрсенбі күні Жамбыл ауылдық округі әкімінің есебіне ұласты.
Есепті жиын әлемді әбігерге салған пандемияға байланысты онлайн режимде өтті. Аудан әкімі Жандарбек Далабаев алдымен алғашқы үш есепті басқосуда көтерілген мәселелерге тоқталды. Тұрғындар тарапынан түсіп жатқан сұрақтар мен талаптар басшылыққа белгілі. Олар – жол, жарық, ауызсу және ғаламтор байланысына қатысты. Осы орайда Жандарбек Ермекұлы бастапқы жоба бойынша 2016 жылы пайдалануға берілуі тиіс Қаскелең топтама су жүйесінің белгісіз себептермен тоқтап қалғанын тілге тиек еткен. Құрылысы 2018 жылы қайта жаңғырған бұл жоба толықтай жүзеге асырылғанда ауданға қарасты барлық елді мекендер ауызсумен толықтай қамтамасыз етіледі.
Жоғарыда айтқандай, Алматының іргесіндегі ірі ауданның халқы табиғи өсіммен бірге ішкі миграция есебінен де шұғыл өсуде. Бұл жаңа ауылдар мен шағынаудандардың, жаңа көшелердің бой көтеруіне ықпал етуде. Осыдан келіп жол, жарық, мектеп пен балабақша мәселелері туындайды. Мұны бір мезетте шешу мүмкін емес. Осыны айтқан аудан әкімі соңғы жылдары жол салуға қомақты қаржы бөлініп келе жатқанын, күре жолдар ретке келтіріліп, енді елді мекендердегі негізгі көшелерді асфальттау жүйелі түрде қолға алынғанын баяндады. Бұл жерде ауылдарды абаттандыру, көшелерге тас төсеп, жарықтандыру әр жылдарға бөлініп, жоспарланған. Бұл жұмыс осы кестеге сай атқарылатын болады.
Осыдан кейін Жамбыл ауылдық округінің әкімі Тұрарбек ТҰРАШЕВ сөз алды. Ол алдымен былтырғы есепті жиында айтылған сын-ескертпелер мен ұсыныстарға тоқталып, олардың орындалу барысын хабарлады.
Осыдан кейін Тұрарбек Тұрсынбекұлы онлайн келіп түскен сұрақтарға жауап берді. Атап айтқанда, Қошманбет ауылының тұрғындары жаңа мектеп салу қажеттігін, электр жарығының жекеменшіктің қолында болуына байланыста қымбат әрі жиі үзілетінін жеткізсе, көпбалалы және жалғызбасты аналар көгілдір отынға қосылу жұмысына жеңілдік жасалынса деген ұсыныстарын жеткізді. Көпшіліктен түскен сұрақтар көшелерді асфальттау, ауылдарды интернетпен қамтамасыз етуге бағытталды.
Тұрғындар көтеріп отырған мәселелердің маңызды әрі күрделі қаржыны қажет ететін тұстарына түсініктеме беріп, жасалар жолын айтып отырған Жандарбек Ермекұлы ауыл әкіміне халықтың сенімінен шығу үшін нақтылы жоспар жасап, уәдені орындаудың маңыздылығын ескертті.
Осыдан кейін аудан әкімі Жандарбек Далабаев «2020 жылғы ауданның әлеуметтік-экономикалық даму қорытындысы және 2021 жылғы міндеттері туралы» баяндамасын жұртшылық назарына ұсынды.
Қуат ҚАЙРАНБАЕВ
Қарасай ауданы
