Талдықорғандағы Қоғамдық келісім орталығында «Ауыл» халықтық-демократиялық патриоттық партиясы төрағасының орынбасары Төлеген Сыдықовтың және аймақтағы филиал мүшелерінің қатысуымен онлайн конференция өтті.
Конференцияда партия бағдарламасының бағыттары талқыланып, облыстық, қалалық, аудандық мәслихат депутаттығына ұсынылған кандидаттардың тізімі бекітіліп, партияның XVIII съезіне қатысатын делегаттар анықталды. Онлайн жүздесуді облыс бойынша партия филиалының төрағасы Қанат Бекиев жүргізіп отырды.
– Аймақ бойынша 56 адам сайланды, бүгінгі онлайн кездесуге олардың барлығы қатысып отыр. Жалпы партияда 3 қала, 14 облыс бойынша 17 филиал жұмыс істейді, 300 мыңға жуық адам мүше. Партиямыз Президент сайлауына, Мәжіліс және мәслихат депутаттарының сайлауына қатысты, – деп жан-жақты таныстырып өткен Қанат Ботайұлы партия бағдарламасының негізгі жеті бағытын (Халық рухын жаңғырту; Отбасы мен ананың рөлін арттыру; Жастар – өзгеріс факторы; Ауылды өркендету – мемлекеттік саясаттың стратегиялық мақсаты; Ауыл шаруашылығы – ел экономикасының жүрегі; Қуатты кәсіпкерлік – өркендеген ел; Сындарлы сыртқы саясат) жіктеп айтты.
Жиында қыркүйек-қарашада өткен «Ел аманаты» жалпыұлттық сауалнамасы жөнінде сөз болды. Қоғамды толғандыратын түйткілді мәселелерді саяси бағдарламаларына енгізіп, халыққа тиімді қызмет етуді мақсат еткен сауалнаманың жалпы қорытындысы айтылар күн де алыс емес.
Айта кетейік, «Ауыл» партиясы халықтың мұң-мұқтажын біліп, оларды шешуді аса маңызды міндеті санап, ауқымды жұмыстар атқарып келеді.
Серік ҚАНТАЙ
Алматы облысы
Сурет — ғаламтордан
