«Қазгидромет» алдағы үш күнге арналған ауа райы болжамын ұсынды.
«Алдағы үш тәулікте Қазақстанның басым бөлігінде ауа температурасы біртіндеп төмендеп, Екатеринбург ылғалды циклоны әсер етеді. Кей жерлерде қар жауады, жел күшейеді, еліміздің солтүстік жарты бөлігінде бұрқасын болады», — делінген «Қазгидромет» хабарламасында.
Еліміздің батыс аймақтарын жайлаған суық солтүстік-батыс антициклонның жылжуымен 15 қарашадан бастап тоқтауы мүмкін. Жауын-шашын да сол кезде азаяды. Түнгі уақыттарда еліміздің басым бөлігінде 10-18 градус аяз болады. Қазақстанның оңтүстік-батысында (Маңғыстау, Қызылорда), оңтүстігінде (Түркістан, Шымкент, Тараз аймағы), оңтүстік-шығысында (Алматы облысы және Алматы қаласы) және шығысында (Өскемен, Семей аймағы) 2-13 градусқа дейін төмендеп, аяз сақталады. Осылайша, еліміздің барлық аймағында ауа температурасының біртіндеп төмендеуі күтілуде. Республика бойынша кей жерлерде тұман түсіп, оңтүстікте (Қызылорда, Шымкент, Түркістан, Тараз, Алматы, Талдықорған) көктайғақ болады.
«ЖЕТІСУ-АҚПАРАТ»
Сурет — ғаламтордан
