Алматы облыстық төтенше жағдайлар департаментінің өрт сөндіру және авариялық-құтқару жұмыстары қызметімен «Текелі энергокешені» ЖШС ғимаратында оқу-жаттығу дайындағы өтті. «Қыс – 2020» республикалық штабтық жаттығуына сәйкес дәл осындай шаралар аймақтың барлық өңірлерінде көрініс тапты.
Оқу-жаттығудың мақсаты – азаматтық қорғау мемлекеттік жүйесінің және халықтың қысқы кезең жағдайында төтенше жағдайларды жоюға әзірлігі мен қабілетін арттыру, азаматтық қорғау қызметтері мен құрылымдарының әзірлігін тексеру. Тактикалық арнайы жаттығу кезінде «Текелі энергокешені» ЖШС қазандық объектісінің екінші деңгейдегі галереясында қысқа тұйықталу нәтижесінде өрт шығып, қазандық төбесіне өрттің таралу қаупі туындады. Өрт салдарынан қазандық қызметкерлерінің өмірі мен денсаулығына қауіп төніп, Текелі қаласының тұрғындарына жылу энергиясы берілмей қалу оқиғасы орын алды.
— Өрт сөндіру және авариялық-құтқару жұмыстары қызметінің бөлімшелері қазандықтағы өртті жою, зардап шеккен қызметкерлерді қазандық ғимаратынан эвакуациялау бойынша дағдыларды пысықтады. Оқу-жаттығу барысында күйік белгілері бар, иісті газбен уланған адамдар ғимараттан шығарылып, жедел медициналық жәрдем бригадасына тапсырылды. Оларға дереу алғашқы медициналық көмек көрсетіліп, кейіннен ауруханаға жатқызылды, – деген облыстық төтенше жағдайлар департаментінің «Өрт сөндіру және авариялық-құтқару жұмыстары қызметі» мемлекеттік мекемесінің бастығы, азаматтық қорғау полковнигі Данияр Ысқақов адамдарды құтқару үшін альпинистік жабдықтарды қолданғанына тоқталды. Сонымен қатар, оқу-жаттығу өз деңгейінде өтіп, жеке құрамға қойылған мақсаттар орындалғанын айтты.
Оқу-жаттығуға облыстық төтенше жағдайлар департаментінің 39 қызметкері мен 10 бірлік техникасы, Аппаттар қызметі орталығынан 3 қызметкер мен 1 бірлік техника жұмылдырылды. Жедел медициналық жәрдем қызметінен 2 бригада жүктелген міндетті жоғары деңгейде атқарып шықты. «Қыс – 2020» жаттығуы шеңберінде бүкіл облыс бойынша өрбіген оқу-жаттығулар күшейтілген санитариялық-эпидемияға қарсы және санитариялық-дезинфекциялық режимді сақтай отырып өткізілді.
Мәулен ӘНЕРБАЙ
Текелі қаласы,
Алматы облысы
