Ел аумағындағы коронавирустың таралуы жөніндегі кейінгі көрсеткіштің өзгеруіне байланысты облыс орталығы Талдықорғанда сенбі-жексенбі күні кейбір шектеу шаралары қайта енгізілді. Көрсетілген тәртіпті аттап өткісі келетіндер әлі көп. Осы орайда Алматы облысы әкімінің орынбасары Батыржан Байжұманов бастаған арнайы бақылау тобы қаладағы сауда орындарын, мейрамхана, сондай-ақ, халық көп жиналатын жерлерді аралады.
Бақылау тобының мүшесі, Талдықорған қаласы әкімінің орынбасары Сәуле Арзанбекова:
– Облыстағы бас санитарлық дәрігердің кейінгі қаулысына сәйкес қойылған талаптарды бақылау үшін қала бойынша төрт тексеру тобы (екеуі қалаға қарасты ауылдық округтерде, екеуі қалада) жұмыс істейді. Бір күнде 52 нысанды аралаған сәт те болды. Кіші және орта бизнес субъектілеріне қойылған санитарлық талаптар орындалып жатыр. Алайда тәртіп бұзатындар да жоқ емес, – деді.
Расымен де, өзін де, өзгені де ойламай, заңды белден басқандар табылды. Мәселен, «АЙЯ» мейрамханасы араға апта салып, елу адамды жинап, ас өткізіп жатқан жерінен екінші мәрте ұсталды. Заңға сәйкес, сенбі-жексенбіде жиын, той, шара өткізуге тыйым салынған. Сәулеті келіскен «Салтанат сарайына» барғанымызда жайылған төрт дастарқанға куә болдық.
Батыржан Құлаймергенұлы бастаған тексеру тобы бірден хаттама толтырып, әкімшілік құқықбұзушылықтың 425-бабында көрсетілген «халықтың санитариялық-эпидемиологиялық саламаттылығы саласындағы заңнама талаптарын, сондай-ақ, гигиеналық нормативтерді бұзу» бойынша жауапқа алды.
Толтырылған хаттамалар облыстық тауарлар мен көрсетілетін қызметтердің сапасы мен қауіпсіздігін бақылау департаментіне жолданады. Сенбі-жексенбіде тек тапсырыс бойынша жұмыс істеуге тиісті «Теңіз хан» кафесі де адам қабылдап, қызмет көрсетіп жатқаны үшін хаттамаға ілінді. Ал «Еуразия банк», «Хоум кредит банк» және «Технодомдағы» кезектегі ара қашықтықтың сақталмағынана байланысты ескерту айтылды.
Тексеру тобымен барған «Skazka» кафесі (тек тапсырыспен жұмыс істеуде), «Пинта» демалыс орны, «Alser» электроника тауарларын сататын жер, «Magnum» сынды дүкендерде тәртіп толығымен сақталған. Есіктен кіріп-шыққаныңа дейін індеттің алдын алу шаралары көзге көрініп тұр. Бұл тұтынушының, тұрғындардың денсаулығына жауапкершілікті білдіреді.
Бақылау тобының бір күндік жұмысын қорытындылаған Алматы облысы әкімінің орынбасары: «Қалада карантиндік талаптардың сақталуы қалыпты. Арақашықтықты сақтау, бетперде киіп жүру тұрақты. Ал тәртіп бұзғандарға айыппұл салынады, одан қорытынды шығармаса, жаза күшейеді. Бақылау тобының жұмысы күнделікті тұрақты жүріп отырады. Нәтижесі айтылады», – деді.
Серік ҚАНТАЙ
Фото — Аслан ҚАЖЕКЕ
Алматы облысы
