Алматы облысының төтенше жағдайлар департаменті ауа райына қатысты ескерту жариялады. Бұл туралы «Жетісу» газеті хабарлады.
«Қазгидромет» ұсынған қысқамерзімді ауа райы болжамына сәйкес, Алматы облысында 2020 жылдың 9-12-13 қараша күндері жауын-шашын, қар, таулы аймақтарда нөсер, кей жерлерде тұман, көктайғақ күтіледі. Оңтүстік-батыстан солтүстік-шығысқа ауыспалы жел соғады. Желдің күші секундына 9-14, кей жерлерде 15-20 метрге дейін жетеді. Ал түнде ауа температурасы 5 градусқа дейін төмендейді, кей жерлерде -3 градусқа дейін үсік жүреді.
Осыған байланысты қысқы кезеңдегі төтенше жағдайларды болдырмау үшін келесі маңызды ережелерді естеріңізге саламыз:
— азаматтар автокөлікпен жолға шығар алдында ауа райына назар аударсын;
— көлік дөңгелектерін алыс жолға шығарда қысқы режимге ауыстырсын;
— машинада күрек пен балта, жылы киімдер, сіріңке мен жарықтандыру құралдары, азық-түлік қоры, алғашқы медициналық көмек заттары, зарядталған ұялы телефон болсын.
Төтенше жағдай туындаған жағдайда тәуліктік бірыңғай құтқару қызметінің 112 немесе 101 нөміріне қоңырау шалыңыз.
«ЖЕТІСУ-АҚПАРАТ»
Сурет — ғаламтордан
