Алматы мен Шығыс Қазақстан облыстарының шекарасына коронавирус дертінің өршуіне байланысты санитарлық пост қойылды. Бұл туралы Алматы облысының бас санитар-дәрігері шығарған жаңа Қаулыда көрсетілген.
Санитарлық пост қызметіне Алматы облысының полиция өкілдері мен медицина мамандары тартылған. Олар Алматы облысынан Өскеменге қарай шығатын және кіретін жолаушыларды тіркеп, дене қызуын өлшеп отырады. Сонымен бірге, жолаушылар бекеттен өтерде сауалнама толтырады.
Жаңа Қаулының екінші тармағында: «Алакөл ауданының әкімі, Алматы облысының полиция департаменті, денсаулық сақтау басқармасы және басқа да жұмылдырылған қызметтер Шығыс Қазақстан облысымен шекаралас облыс аумағына полиция, медицина қызметкерлері қатарынан Алматы облысына кіретін және шығатын азаматтарға байланыссыз термометрия және сауалнама жүргізу арқылы санитарлық бекет (601 шақырым) орнатуды; бекеттерге жұмылдырылған қызметкерлер жеке гигиенаны сақтау үшін қажетті жағдайлармен, жеке қорғану құралдарымен (бір рет қолданылатын бетперделер, қолғаптар, қорғаныш көзілдіріктер немесе экрандар), тамақтану және жылыту пунктімен қамтамасыз етілсін», — деп жазылған.
Алматы облысында карантиндік шараларды күшейту туралы жаңа Қаулының мәтінімен осы сілтемеге өту арқылы таныса аласыз.
«ЖЕТІСУ-АҚПАРАТ»
