Сыбайлас жемқорлыққа қарсы іс-қимыл агенттігі мен парасаттылық идеологиясын ілгерілетудің жаңа әдісі ретінде еліміздің қалалары мен ауылдарының орталық көшелеріндегі көпқабатты үйлердің қасбетіне жемқорлыққа қарсы муралдар салу туралы бастама көтерілді.
Осыған орай ҚР Сыбайлас жемқорлыққа қарсы іс-қимыл агенттігі Алматы облысы бойынша департаменті мен Іле ауданы әкімдігінің қолдауымен Өтеген батыр ауылында қос бірдей қазақтың данагөйлеріне арналған мурал салынды.
С.Қолдасов көшесінің бойындағы №19 үйдің қасбетіне қазақтың ұлы ақыны композитор, қазақ жазба әдебиетінің негізін қалаушы Абай Құнанбаевтың алып суреті салынды. Муралға данагөйдің «Ақырын жүріп, анық бас, еңбегің кетпес далаға» деген сөзі жазылған. Аталған мурал хакімнің 175 жылдық мерейтойына тамаша тартудың бірі.
Ал екінші мурал Абай көшесі №23 мекенжайы бойынша орналасқан көпқабатты тұрғын үйдің қабырғасына қазақтың ұлы ғалымы, XIX ғасырдың екінші жартысында Қазақстанда туған демократтық, ағартушылық мәдениеттің тұңғыш өкілдерінің бірі, шығыстанушы, тарихшы, фольклоршы, этнограф, географ, ағартушы Шоқан Уәлихановтың бейнесі бейнеленген. Мурал ағартушының «Дүниеде әділдік пен адалдықты ту еткен адамнан артық ешкім жоқ» деген терең тәрбиелі кмазмұнға ие даналық сөзіне негізделген.
— Осындай іс-шаралар халықтың санасын өзгертуге, сыбайлас жемқорлыққа қарсы мәдениетті қалыптастыруға, адамгершілігі мол ұрпақ тәрбиелеуге арналған, — деді Алматы облысы сыбайлас жемқорлыққа қарсы іс-қимыл департаментінің басшысы Ернар Мақажанов.
Әр қазақстандықтың құқықбұзушылық пен сыбайлас жемқорлыққа қарсы іс-қимыл аясында өзінің белсенділігін танытуы елдегі жағдайды жақсартуға мүмкіндік беретіні сөзсіз.
ҚР Сыбайлас жемқорлыққа қарсы іс-қимыл агенттігі Алматы облысы бойынша департаментінің баспасөз қызметі
