Алматы облысының әкімі Амандық БАТАЛОВ «ANTIKOR» орталығының мәжіліс залында «Antikor Live» жобасы аясында тікелей эфир арқылы Мемлекет басшысы Қасым-Жомарт Тоқаевтың «Халық үніне құлақ асатын мемлекет» тұжырымдамасының аймақта орындалу барысын сөз етті. Эфирде жергілікті атқарушы органдардың сыбайлас жемқорлыққа қарсы саясатты іске асыру жайы да баяндалды.
Шараның модераторы «Жетісу – адалдық алаңы» жобалық кеңсесінің басшысы Аманжол Жазықбаев «Antikor.Live» жобасының мақсат-міндетіне тоқталып, заманауи тәсіл арқылы облыс тұрғындарына сыбайлас жемқорлыққа қарсы қызметтің жұмысы туралы жаңалықтар дер кезінде жеткізілетінін атап өтті. ҚР Сыбайлас жемқорлыққа қарсы іс-қимыл агенттігінің Алматы облысы бойынша департамент басшысы Ернар Мақажанов жыл басынан бері сыбайлас жемқорлықтың алдын алу бағытында атқарылған жұмыстарды баяндады.
— Департамент сыбайлас жемқорлыққа қарсы оннан астам жобаны іске асыруда. «Жетісу – адалдық алаңы», «Адал Ұрпақ», «Саналы Ұрпақ», «Сапалы жол», «Адал жол», «Ашық бюджеттердің интерактивті картасы», «Бизнес пен инвестицияларды Сыбайлас жемқорлыққа қарсы сүйемелде», «Адал көмек» сынды жобалар бар. Облыс әкімдігімен бірлесіп «Сервистік әкімдік» жобасы іске асуда. Сол арқылы мемлекеттік қызмет көрсететін мемлекеттік органдарды бір жерге шоғырландырып, азаматтар үшін қолайлы жағдай жасаудамыз. Бүгінгі таңда облыста 15 сервистік әкімдік жұмыс істейді, – деген Ернар Әбсейітұлы ағымдағы жылдың 9 айында 191 қылмыстық құқықбұзушылық тіркелгенін, оның 145-і сыбайлас жемқорлық екенін айтты.
Келесі кезекте сыбайлас жемқорлыққа қатысты сұрақтарға жауап берген Алматы облысының әкімі Амандық Баталов «Халық үніне құлақ асатын мемлекет» тұжырымдамасын іске асыру арқылы жыл соңына дейін сервистік әкімдіктер өңірдің барлық аудандары мен қалаларында ашылатынына ерекше тоқталды.
— Халық бұрынғыдай әр мекемеге жеке-жеке барып, кезекке тұрмайды. Сервистік әкімдікке келіп, барлық мәселесін бір жерден шеше алады. Бұл, біріншіден, уақыт үнемдесе, екіншіден сыбайлас жемқорлықты болдырмауға жол ашады. Әйтпесе, бұрын әр қызмет үшін ақы сұрайтын жағдайлар кезігетін. Бұл жобаны облыс әкімдігінде де іске асыруға тапсырма бергем. Келешекте орындайтын боламыз, – деді Амандық Ғаббасұлы.
Бұдан бөлек, облыс басшысы «Antikor.Live» жобасының артықшылығын айтып, әлеуметтік желі арқылы көптеген мәселелер шешіліп, тұрғындардың ұсыныс-тілектері орындалып жатқанын тілге тиек етті. Аймақ басшысы тікелей эфирді пайдаланып, облыстың оң көрсеткіштерін, экономикалық өсімді, мемлекеттік бағдарламалардың орындалу барысы мен атқарылып жатқан жұмыстарды назарға ұсынды. Сөз соңында сыбайлас жемқорлыққа қарсы шаралар мен «Халық үніне құлақ асатын мемлекет» тұжырымдамасын орындау әрмен қарай жалғасын табатынын айтты.
Мәулен ӘНЕРБАЙ
Алматы облысы
